情人節撞正大年初一，個個忙拜年，屋企、伴侶手心手背都係肉，走幾場等閒事。其實愛情親情同可兼顧，今日就依方海閱師傅幾招虎年吉利秘技，同大家Plan番個同情人Sweet遊車河「短敍」，甜甜蜜蜜後仲大把時間返屋企陪家人食飯。
記者：徐影龍
攝影：周旭文
Model：Lo、Cupid@PureModels
鳴謝：玄學家方海閱（21441514）
西北有喜
既然要顧及初一拜年應酬親友，同情人遊車河總不能漫無目的四圍Hea。今年就搵嚟香港淳道玄學總會會長方海閱師傅，指出吉利方位、顏色同食品，務求一擊即中添蜜運。「虎年一白桃花星喺西位，有利情緣、人緣同貴人，西北方更係九紫喜慶位，有利結婚同生BB。」咦？港島區最西面係薄扶林數碼港嗰邊，環境清幽最啱拍拖談心喎。西北方即係西環碼頭附近，方師傅話初一最好茹素，食番蛋類或紅豆會好啲，即時諗起林寶拉利車主周日打躉嘅小甜谷。老闆娘谷祖琳諗頭多多，餐牌上好多特色嘢都未見過，而且面對甜品，相信無乜女仔會抗拒。若果跟埋方師傅教路，一個食薑汁燉蛋，一個食有相思豆之稱嘅紅豆類嘅甜品，包保大家食到由個心度甜出嚟。嗰度又係九紫喜慶位，有把握嘅咪順便求埋婚囉。
小甜谷：堅尼地城爹核士街1D地下（34881612）
西位有桃花數碼港浪漫
情人節點可以齋食甜品咁無情調，跟手繼續踩入西方有利位置。近近哋驅車入數碼港，路線簡單唔複雜，先跟薄扶林、再跟數碼港路牌，即可輕鬆到達。途經貝沙灣超靚海景，未到目的地已冧死隔籬嗰件。數碼港唔算大，不過唔想齋行，諗住Shopping睇埋戲嘅，記住跟指示駛入1號停車場，泊好車就可行過數碼廣場慢慢Hea。溫馨提示，廣場地下近戲院有間婚紗舖，想向對方暗示共諧連理、又或怕俾人哦結婚，就要懂得利用呢個「戰略位置」喇。拍完拖，當然係上車繼續行大運啦，順道繞港島一圈，在柴灣折返市中心。
GolfGTI火紅旺財
紅色亦係方師傅推薦為虎年旺財顏色，揀車第一時間諗起福士當紅炸子雞GolfGTI。圍住港島區走完一個圈，行大運之餘順便實戰架GTI。石澳至赤柱大部份都係雙線單程，爽一陣又要慢車，不過試到福士最出名嘅DSG波箱，上上落落順暢有力，輕踏油門慢速玩吓急彎都好有Feel。走薄扶林山路一段較為暢通無阻，大可盡情玩埋軚盤+/-波。扭軚攻彎時，中指輕輕一剔，拖波、升波一氣呵成，真正帶到畀我揸車樂趣。心情舒暢，運勢都強啲。
VolkswagenGolfGTI
引擎：1,984cc直四＋Turbo
馬力：210bhp/5,300-6,200rpm
扭力：280Nm/1,700-5,200rpm
傳動：六速DSG+/-波箱，頭驅
售價：$318,000
查詢：VolkswagenHK（36989688）