去年底何鴻燊出院去澳門見領導人，家人聲稱賭王可以出院返屋企過年，但係噚日證實賭王農曆年要留院送牛迎虎。不過佢不愁寂寞，噚日幾位阿太先後到醫院陪佢過年，隨時好過頻撲走幾場。
超瓊發放近照
超瓊噚日發放賭王中午影嘅近照，相中賭王戴上頸巾，看來精神不錯，面色同去年喺澳門露面時差唔多。賭王喺醫院都發表新年賀辭，祝賀港澳經濟如虎添翼及人人龍精虎猛，又勉勵學生「讀書要出盡九牛二虎之力」。
賭王言論談笑風生，書面賀辭都要搞笑，提醒「做太太要虎視眈眈實老公，因為老虎多數鍾意夜晚出去搵食」。臨尾賭王不忘為賭場賣廣告，指老虎機會送上大jackpot，大家隨時過肥年。
四太梁安琪昨午1點左右離開醫院，佢表示陪完賭王後要趕去澳門。跟住就見二太藍瓊纓及仔女一同到醫院。超瓊現身時稱家人商量過賭王是否出院問題，但賭王冇扭計出院，今次係自己決定留院度歲，而且病房都有新年佈置，好有氣氛，賭王亦會派利是畀護士同食蘿蔔糕。三太陳婉珍同女兒超蓮、超雲，噚晚則喺醫院陪賭王食團年飯，準備咗鮑魚，超蓮仲喺花市買花送畀賭王。