金管局前總裁任志剛退休後，唔單止揭開人生姿彩新一頁，估唔到連dresscode都轉向色彩斑斕，佢喺噚日農曆大除夕接受商台《政經星期六》訪問時就罕有地着咗件粉紅色冷衫，令八方眼前一亮，仲透過大氣電波祝天下有情人終成眷屬。
同日任總亦喺自己個blog擺咗同太太Miranda以紫色情侶唐裝，喺盛放桃花前面拜年嘅閨中照，以及兩人早前去日本九州自由行，彩色頸巾加十指緊扣加街邊拮魚蛋溫馨照，從衣着可見佢退休生活好寫意，同以前日日一式Armani西裝真係判若兩人。任總不在江湖似在江湖，好多人都認為佢會參選特首選舉，佢噚日引用終院大法官李國能名言「荒謬」回應。