示威、遊行、開會、做電台節目、扮差人玩抬人遊戲，靈詩跟阿豪，拍拖節目比一般情侶豐富，二十出頭，一身二手潮服，卻先天下之憂而憂：夢想結束一黨專政、建設多元社會。反高鐵、爭民主，二人一起上前線；衝鐵馬、燒黑旗，誓要衝破專制牢籠，行動雖激，卻毋須擔心對方擔心，「因為佢就喺我隔籬衝緊。」是日情人節，兩個人最想到禮賓府野餐，相信應該很浪漫。
靈詩與阿豪，在六四20周年音樂會相識，靈詩直言，愛夾band的阿豪與她思想相近，跟過往的男朋友不同，「以前嗰啲唔啱嘴形，我同佢哋傾失業問題，話啲人失業唔係懶，係社會制度做成，佢哋覺得我懶高深，我覺得大家冇空間溝通，好冇癮，家同佢可以溝通到，就算意見唔一致都會傾，尊重對方。」
靈詩曾當社工，早前在教育學院念幼兒教育，結果「頂唔順」放棄，「佢強制住hall，咁大個人我識分自己使唔使住hall，唔使你迫我，嗰時我搞緊領匯，成日要出去開會開到好夜，冇車返嚟，又要畀hall錢；我着背心返學又俾人話我唔檢點。」靈詩不聽話，是因為別人沒有用文明來說服她。
拍拖節目：示威 開會 再開會
過時過節，二人不會去高級餐廳，最多是開會、開會、再開會，覺得情人節和聖誕一樣，是商人的玩意。拍拖第一個平安夜，二人吃完飯，回到101電台會朋友。翌日起來，聽到劉曉波的判決，即時決定到中聯辦示威，「晏晝瞓醒整支旗，我哋喺唔同方位用火機燒，差佬話唔畀燒，我哋照燒，個差佬擒高用滅火筒噴埋嚟，有個企得近嘅朋友咪食晒囉。」
二人同行，不需要再擔心另一半擔心，靈詩說：「唔會話唔鍾意（我衝），又唔使話擔心對方，因為根本佢就喺我隔籬衝緊。」靈詩還說，以前參加示威很和平，後來多次遇到警方阻撓，令她忽然醒覺不可以再退讓，決定進一步行動，給政權更大壓力。
去年11月1日，網民圍禮賓府，她和阿豪未上斜路已見有很多鐵馬，於是扮拍拖行動植物公園，被警方發覺，30多個警察用鐵馬把他們重重圍住，「行行人路係我哋基本人權，佢迫我哋喺鐵馬入面行，如果佢哋唔係咁封路，可能我會好和平，示威完就走，家佢要我哋去對面馬路，下次要我哋去對面海都得o架啦，我哋唔可以越退越後。」今年情人節，二人沒有特別計劃，心願卻是重回禮賓府，二人野餐或打邊爐過節。