虎年大年初一，八方祝各位讀者新年進步，身體健康，財源廣進，萬事勝意，大吉大利，今年做事唔好虎頭蛇尾，做人唔好與虎謀皮，要知禮義廉恥，總之心想事成，香港早日有真普選，真民主。
每年7300萬鯊魚被殺
今年百物騰貴，食餐大魚大肉團年飯真係好和味，好彩香港勝在有民建聯，街坊團年飯、開年飯食得唔夠豪，可以參加民建聯北區支部隆重推出嘅虎年新春行大運「魚翅撈飯一天遊」！仲要係平民價每位只收128蚊，童叟無欺，寫到明有魚翅撈飯兩大盆！
素來請食蛇宴出名嘅民建聯，虎年再升一呢，請食魚翅，保皇黨確係今時唔同往日，多到數唔晒嘅「民建聯成功爭取乜乜物物」政績榜，虎年再添一宗。禮義廉黨無恥有翅，可惜少數不明真相嘅民眾卻唔領情，仲聲言要向WWF（世界自然基金會）告狀，投訴民建聯唔保育，「民建聯成功爭取多N條鯊魚被殺！」有網民比較關心消費者權益，質疑隨時貨不對辦，「128蚊？分分鐘係假魚翅。」
八方以街坊身份向民建聯粉嶺辦事處嘅聯絡人吳耀祖查詢，佢強調魚翅係堅嘢，會喺北角一間酒樓度食，保證足料，包食到夠。WWF對政黨搞魚翅宴好有保留，海洋環境保護主任杜偉倫話：「全球每年有7,300萬條鯊魚被捕殺，家已經有過百種鯊魚受到滅絕嘅威脅，其中最主要原因就係人類食魚翅。」
魚翅撈飯樹壞榜樣
民記「魚翅撈飯」團引起網民爭論，有留言指無論係真翅定假翅都好不該，「最大問題唔係真假，而係魚翅撈飯呢個意識問題，已經帶來不良風氣和壞榜樣。當然如果係真就真係要聲討，話晒佢係香港第一大政黨；就算係假，都唔應該鼓吹。」民建聯幾年前曾詢問政府會否限制魚翅入口，不過該黨無主張禁食魚翅。
八方冇乜機會食翅咁奢侈，一年到晚做唔停手，新春唞唞，大年初二、三、四，同單仁一齊休息三日，全力出擊利是，初五啟市再同大家拜年。
mailto:[email protected]