張敬軒的紅館跨農曆年個唱前晚開鑼，密友關智斌（Kenny）沒有出現，被曾問軒仔「受唔受媾」的女歌迷攝位，送禮親近偶像，軒仔在台上忽然感嘆最回味初戀，又表示Kenny拍戲不會任嘉賓。其實歌迷很接受二人緋聞，為他們做網頁，軒仔母親更叫Kenny得閒飲湯。
張敬軒一連四場《軒動心弦演唱會》前晚年廿九在紅館開鑼，今次軒仔跨年開騷，帶着濃厚賀年氣氛，又在台中央特設貴賓席，與歌迷近距離接觸。軒仔契爺陳鼎禮、胡文新、董建華夫人董趙洪娉及楊受成夫婦等都有捧場。
忽談初戀最回味
軒仔邀請內地歌手孟嵐、吳浩康（Deep）及方大同任表演嘉賓，但其密友關智斌及王菀之均未見蹤影。軒仔除演奏樂器，唱賀年歌外，又與女舞蹈員跳辣舞，做出互摸及瞓大髀等動作，他又在台上表演快速換衫，博得歌迷嘩鬼叫。其中一位坐貴賓席的盛裝女歌迷送禮給軒仔，軒仔說：「佢係我唯一一個女fans會寫紙仔畀我，係寫靚仔，受唔受媾呀。」
軒仔唱《遇見》前忽然有感而發：「每個人都尋覓一段特別感情，有時搵個自己愛嘅人，佢覺得唔啱離開你，呢啲控制唔到嘅，每晚臨瞓前都諗一段往日情，可能初戀係最令你回味o架。」
當吳浩康以搖滾造型出場時，軒仔說：「Deep係我同期新人，我初初喺內地嚟，多得佢同Steven（張致恒）幫我。」Deep搶說：「仲有一個。」軒仔大方大叫關智斌名字，他又謂希望有朝一日可與Deep爭最受歡迎男歌手獎。
事後軒仔接受訪問，談到早前Kenny被拍得出入軒仔家，他們即找Deep來聚會救駕，故軒仔喚Deep作救命恩人，他大讚Deep：「好講義氣，有時救吓朋友都要。」軒仔謂Kenny要拍戲不會任嘉賓，也未知可有時間來捧場。他又謂公司沒有就其拍拖新聞施壓，又說：「我媽都叫斌仔得閒上嚟飲湯。」
歌迷聯盟搞網頁
軒仔又透露有他及Kenny的歌迷聯盟做了一個二人的網站，看來歌迷甚接受他們的緋聞。談到盛裝女歌迷求愛，軒仔說：「佢有次送個垃圾鏟畀我，話知我前一晚打爛玻璃杯，其實係佢自己諗出嚟o架，好特別。」
採訪：馬建華 攝影：陳慧安
