每年大年初一㩒着個電視，都係見到好多人湧去黃大仙爭崩頭為上頭炷香！捱住眼瞓同人逼，都係為咗喺新一年攞個頭彩啫，據講呢啲叫搶運，新一年成功上到頭炷香，特別容易心想事成。咪以為上頭炷香只係鬥快插香，其實拜神要誠心之餘，仲有好多規矩要知。
記者：趙慧敏
攝影：陳盛臣
鳴謝：嗇色園、玄學家周漢明
Model：Sandy、Kitterick@PureModels
舊年去過黃大仙祠嘅人一定知道，因為祠內進行擴建工程，原本喺大殿的黃大仙寶像一度要移師到鳳鳴樓，地方細咗，排隊時間又多咗，搶先上到頭炷香嘅機會當然唔高。雖然工程至今仍未完全竣工，但係大殿參神平台位置工程已基本完成，黃大仙寶像重返大殿，善信又可以返嚟平台位置上香，單係呢個平台就可以同一時間容納2,000名善信，地方大咗，搶到靚位上頭炷香嘅機會自然高。
兜一轉大殿右邊旺財
為咗方便上頭炷香，祠方會因應人潮配合警方安排人潮管理措施，上香人士要由大門指定嘅單一路線進入祠內，而參神平台上嘅上香位，就是一眾上頭炷香善信嘅目標，有心上頭炷香嘅人，記住呢個參神行大運路線。先由正門出入口處勸善廊為起點，經金華分迹牌坊，到仙師寶殿，三聖堂、經堂，最後經盂香亭至正門斜路離開，上頭炷香位置正喺金華分迹牌坊前嘅大殿，想成功搶運，記得認清路線，霸定個靚位。
香港今年經濟環境好似玩過山車咁，股市大上大落，都咪話唔驚心，求財嘅善信一定佔絕大多數，想財運亨通，唔係飛插支香上個香爐咁就搞掂。玄學家周漢明就話，今年財位喺正中心位置，而東面則係迎財位，以黃大仙祠位置來看，參神平台處於祠內中心，正是財位所在，如果想再旺一旺，不妨先由參神平台中心位置再兜一轉東面，即面向大殿右邊位置，才到大殿前上香。
吉時凌晨3時至早上7時
大年初一一般稱為開正，天門大開，神明會現身幫助善信，而上頭炷香人士，則被視為最能令神明留下印象，所以賜福亦相應較多。以前聽人講上頭炷香一定係子時（晚上十一時至凌晨一時），甚至規定只係午夜十二時，原來並不可以作準。周漢明師傅話上頭炷香嘅吉時每年皆不同，所謂吉時就係向神明上頭炷香嘅時辰，今年上頭炷香嘅吉時應該係寅時（凌晨三時至五時）及卯時（清晨五時至七時），揀呢段時間先上頭炷香，唔使爭崩頭之餘，反而更加大吉大利。
開放時間
大除夕：上午七時至下午五時半、晚上九時重開
大年初一：直至傍晚六時半
網上上香
黃大仙祠一向香火鼎盛，人逼人在所難免，如果怕擠逼又或身在海外，喺家科技咁發達嘅年代，祈福都可以喺屋企做。嗇色園為了讓善信同沾恩澤，年三十當晚會在祠外設大型顯示屏，直播該園眾道侶在大殿內為全港市民誦經禮懺（年三十晚上十一時三十分至大年初一零時），另外善信亦可登入嗇色園網頁之網上直播及網上祈福，感受一下祠內氣氛。
網址： http://www.siksikyuen.org.hk
數碼靈籤實啱數
新一年除咗上頭炷香攞個彩之外，總係想求支好籤，以前成日擔心籤筒啲籤係咪夠數，又或者會唔會重複，以後就無呢個煩惱啦！事關黃大仙祠今年引入數碼靈籤管理系統試驗計劃，實行將數碼標籤植入籤支內，透過無線射頻辨識技術，只要把載有籤支嘅籤筒放入掃描器，三至五秒，就可Check到籤筒內100支靈籤是否全部齊全，以後善信就求得安心啦！不過新春期間仍會提供傳統靈籤給善信使用，待新春過後先會試行。
犯太歲要買風車
上咗頭炷香，個人都醒神啲，不過今年有幾個生肖要特別小心！好似屬虎嘅人今年犯本命太歲，生肖屬猴嘅就冲太歲，生肖屬蛇就刑太歲，生肖屬豬就係破太歲。如果呢幾個生肖嘅善信上完頭炷香，暫且留步，到附近香燭店買番個風車催旺一下，又或者佩戴相應嘅飾物化煞。
交通提示
黃大仙祠喺港鐵站旁，交通方便，要開車去都得，黃大仙祠附近有幾個停車場，搵位泊車一樣唔難。
露天停車場：喺黃大仙祠旁邊，平日時租$6，不過新年期間有可能隨時加價。
盈鳳里停車場：喺新光中心旁嘅豪苑，入口於盈鳳里，平日時租$12，假日$14。
竹園南邨停車場：喺與黃大仙祠一街之隔嘅竹園南邨，車位較多，時租$13，晚上11時至翌日7時，只係時租$9。
其他上香熱點
當然上頭炷香並非只此黃大仙祠一家，因為各祠廟供奉不同神明，善信亦可在其他祠廟上頭炷香，但首選條件係祠廟一定要長年香火鼎盛，歷史悠久甚至以古廟為佳，上環文武廟及沙田車公廟等，同樣係上頭炷香嘅上佳地點，靈驗程度相應較高。
上環文武廟（今日7am-明天7pm開放）
沙田車公廟（今日11pm-明天5:30pm開放）
拜神規矩你要知
‧祠廟乃莊嚴之地，參拜時裝束必須要整齊，女士們避免穿着暴露或過份性感，顏色方面由於剛值新春，最好配以鮮艷顏色。而男士則要打扮整齊，素色衣服或配搭鮮艷顏色均可，但就忌全黑全白又或穿上拖鞋。
‧入廟時，先踏入左腳，口中念一些吉利說話。
‧所謂上頭炷香，香火自然最重要，過往一直認為越大支香越誠心，由於香燭燃燒時間正代表善信嘅敬意，越大支香，燃點時間越長，則代表善信越敬重神明。但隨住黃大仙祠限制善信香燭大小，大香都唔係咁合時宜。
‧唔少善信為慳時間，點香後會直接用口吹熄香火就匆匆上香，原來此舉有不敬之意，最好還是用手撥。
‧上香時一般以三支香為一炷，為表示誠意，香燭點燃後，參神時要在頭、口、心三位置揖一揖，誠心祈福，此動作包含善信心服口服之意。
‧上頭炷香嘅意義在於祈福保平安，許願時切忌獅子開大口，否則只落得願望落空。
‧大年初一宜進不宜破，入到廟內記得不要撕破任何東西，例如紙張，布料，連剪指甲都唔好，否則破壞神明心情，嚟緊一年隨時無運行。
