出版34年嘅《選擇》月刊，今期慶祝出版400期，近年《選擇》封面人物都係當紅明星，總幹事劉燕卿話其實76年創刊之初，並冇呢個做法，多數係職員搵親友拍膊頭做模特兒，第二期封面照，就由當時總幹事張綠萍一對孖女做主角，可能係香港第一代o靚模，而呢對孖女正是哥哥張國榮外甥女麥嘉軒、嘉殷。
安全套封面最好賣
《選擇》後來改用明星做封面人物，原來係報販建議，因為明星有吸引力可增加銷量，消委會幾經考慮先決定改用明星做封面人物，但唔可以同測試產品有利益衝突，第一個上《選擇》封面明星係張國榮，即係張綠萍細佬。
擺明星上封面有助賣書，不過多年來銷量最高一期，封面並唔係明星、o靚模，而係家計會前總幹事林貝聿嘉。該期主要內容係安全套測試，當年性觀念冇咁開放，冇明星肯同安全套合照，好彩林太肯上陣。
當時消委會發現市面多款安全套有滲漏問題，呢啲係足以「搞出人命」大事，人人關心，竟然賣出逾70,000本，紀錄至今未破，近年每期平均賣30,000多本。