周五05/02
熱門客笑騎騎
紐記歇冬來個中期換血，波友無視合作問題，傾注捧佢哋打冧卡城；結果一開波10幾分鐘已攻入3球，盡顯超班本色，買大都中埋；加埋熱爆W不來梅臨尾發力，熱門客由頭到尾都咁好味。
閒贏指數：★★★★★
周六06/02
曼聯躉好舒暢
落pub欣賞晚上英超，成個老尖當然係播曼聯對老樸呢場強弱大戰，只見曼聯入第1粒，大家似乎冇乜反應，第2粒都一樣……，直至下半場徹底擊破對手，曼聯躉舒服晒，不過若果你串埋同時間開波嘅曼城，sorry幫唔到你。
閒贏指數：★★★★
周日07/02
「廠迷」提早瞓覺
焦點當然係車仔迎阿仙奴，你咪話波友唔識睇陣容買波，客軍出「病壞」禾確特拍艾沙維打箭頭，面對高頭大馬嘅車仔，即見車迷起勢落注，亞洲盤讓到半/一，「廠迷」又見半場落後兩粒，可提早瞓覺；全日上盤大旺，除非你瞓唔着兼係作客要讓球嘅西維爾粉絲。
閒贏指數：★★★★
周一08/02
冇波睇攻熱W
禮拜一個個都可以唞唞，而且足智彩仲提早幾粒鐘截飛，但熱門客冇波睇都唔放過高車士打同布拉加兩熱W；吓，瞓醒又得咗！
閒贏指數：★★
周二09/02
保頓「屎」益曼城
全世界都捧曼城[-1]，為留力聽晚冇睇波，但重播所見，艾迪巴約入波都算金球？不如話保頓後衞「屎」；但替大部份波友贏到錢，佢呢鋪都算好球員嘅！
閒贏指數：★★
周三10/02
拖肥「鯁死」車仔
唞足精神，半夜起身睇英超之夜，阿仙奴利記上半場悶到爆；車仔曼聯全程冇甜頭，「廠」迷睡得甜了，但「魔」迷失2分無壞喎，因為車仔竟被粒拖肥「鯁親」。
閒贏指數：★★★★
周四11/02
唔啱賭歲晚收爐
冇場啱賭，同股市一樣，歲晚收爐好了。
閒贏指數：★