特首煲呔農曆年前例牌拍賀年短片向市民拜年，今年有新意思，首度以動畫拉埋麥太、麥兜一齊拜年。短片長30秒，視民望如浮雲嘅煲呔得償所願，好似浮雲咁同麥兜一齊喺香港上空飛翔，之後趕返禮賓府曾太身邊，象徵經過一年努力工作，人人都回家同家人共度新歲。
煲呔又話希望所有香港人，不分年紀、崗位同意見，都同樣可以喺家裏感受新年喜悅同祥和。政府噚日宣佈，煲呔16日至19日放假，會離港避年。呢套賀年動畫今日喺電視首播，亦會上載特首網頁同YouTube，新年期間，屋邨大堂、機場、主要邊境管制站、領匯商場同康文署體育館都會播出，部份國泰航班都有得睇。最後值得一提係特首賀年動畫主題係「回家真好」，煲呔暗撐流亡民運人士，八方都好感動。