過年睇套咁嘅戲﹖好似唔多好意頭。非也！否極泰來，人生滿希望。
雖然的確是套災難片，天災人禍，地震、海嘯又冧樓，但親朋戚友上到嚟拜年，而你又想展示吓屋企副架生有幾強，點都係揀套藍光大製作至夠撐！
記者︰陸俊雄
畫質無驚喜
《2012》有大量CG鏡頭，表現亦算中規中矩，雖然夠清晰亦唔矇，不過有過份銳利，令倒塌中的大廈似模型。飛機像穿山洞飛過大廈時問題不算大，但正面看住大廈陸沉那一幕，你唔好同我撐仲話好真實！而且主角經常在死人冧樓現場，甚或火山大爆發中穿插，死極死唔去之餘又欠原因交代，簡直係不死神人化身，亦令劇性欠缺真實感。
話佢CG假，又唔係淨係呢套先係咁嘅！況且更令我記憶猶新，想起之前哈利波特，鄧不利多舞火龍矇到離晒譜，所以如果要我揀，我寧願睇件清嘅。
環迴聲不俗
畫講完，聲就比想像中好。大家唔多唔少都知道劇情，《2012》不斷重複荷李活「Lastminute大難不死定律」，呢個名我改嘅，如果唔靠音效無止境低頻及環迴立體聲逼埋嚟，睇落感覺會似打機、兼毫無新意。不過呢方面《2012》做得唔錯，特別係開波無耐已經陸沉那幕，有一下衝過玻璃突然靜晒，都仲記得好清楚；末世崇拜狂人在山上那幕，火舌衝過來，火球一個接一個飛墜，追住架車死都唔放，包圍感都做得不俗。相信買呢隻藍光碟的，無非最想有呢種感受啫，所以一定滿意。
專家評中上
今回藍光實驗繼續都係AlanLee，佢都話睇CG片，高質量的，係做到畫面連貫地清晰，但大多數都做唔到，《2012》亦不例外。不過佢都讚音效方面，有幾幕都可以用來做示範位。咁講，都買得過，不過藍光鐵盒都幾貴，下次可以平少少嗎？
