樂觀對抗癌魔嘅支聯會主席司徒華日前喺維園露面後，噚日再現身，去香港電台出席節目《議事論事》活動，獲港台頒發「最長情」及「最墟冚場面」獎，表揚佢堅持不懈主持六四燭光集會同去年有20萬人出席燭光集會，華叔領獎時，更大爆港英想支聯會解散秘聞。
《議事論事》以搞笑頒獎禮形式回顧牛年政壇大事，華叔代表支聯會兩度上台領獎。日前喺維園露面時，華叔精神飽滿，噚日卻似乎略有疲態，佢冇多談病情，強調會遵醫生吩咐治療。雖然狀態冇咁好，不過華叔記憶力不減，喺頒獎嘉賓李鵬飛手上接過獎項後，大爆飛哥做「中間人」內幕。
嘲飛哥枉作傳話人
據華叔稱，多年前飛哥曾代表港英政府叫佢解散支聯會，目的當然係唔想支聯會影響政局同中英關係，華叔當然係一口拒絕，否則家都攞唔到「最長情」獎，佢又話飛哥枉作傳話人，「你唔了解我為人，假如了解我，你唔會同我咁講。」
工聯會陳婉嫻噚日都係頒獎嘉賓，其間借題發揮，指從政多年經常同官員有爭拗，但最激氣係最近討論港鐵沙中線興建鑽石山通風站工程，嫻姐指好多居民擔心工程滋擾，要求港鐵改善，不過有個副局長卻一味官腔唔聽民意，「激到我拍枱話唔會再同呢個人傾！」雖然嫻姐冇點名，但好多人都知激嬲佢嘅就係運輸局副局長邱誠武，得罪有34萬會員嘅工聯會，八方祝邱副局長虎年有運行。
卿姐唔准議員爆粗
高鐵撥款戰中，兩不討好嘅財委會主席卿姐獲頒「最難為主席」獎，卿姐領獎時再次訓示毓民同金勞詹，叫兩人唔好再在議事廳嗌交爆粗，「如果唔係一定『烹』出去！」佢更向金勞詹下戰書，指金勞詹如果唔忿氣，下屆可以同佢競逐財委會主席，一決高下，如果老詹贏出，咪可以趕卿姐走囉。
議員喺立法會上演大龍鳳，長篇大論文戲連場都幾悶，幸好有動作場面調劑，身手敏捷接住蕉、紙牌、微波爐嘅保安員，獲「最佳身手」獎當之無愧，可惜噚日冇代表領獎。
mailto:[email protected]