轉新地盤望尋突破，今次頭炮推介識喺英足盃變身嘅雷丁，打敗英冠同級勁旅西布朗。
後生時一班同學柴娃娃雞仔注玩賽馬，依然做足「功課」，尤其係周末，戇居得嚟好認真去報檔買十蚊廿蚊嘅貼士，原來只係一張相信係大量濫發嘅影印紙；又試過打電話去聽貼士，所謂著名評馬人，專登拖長條聲帶講當日天氣，講跑道特色，廢話連篇，志在呃嗰一百幾十蚊。最過癮莫過於睇電視台深夜賽馬預測；乜嘢谷到蝦公頸、長短韁繩練長短途馬或者四蹄盡展忠心白鼻馬，睇到啲馬評家不知講到幾pro（專業），看過，下注始終安心啲。
家全攻足球，今明兩晚冇英超賭，由英足盃主打，個人心水屬今非昔比嘅雷丁。睇呢個盃，用賽績、排名同莊家心態有啲嘥氣，唔係英超Big4中都唔會有3隊喺16強已經冇影；搵錢冇人嫌多，但要識得分輕重，打得密要取捨好明顯令強隊焗棄呢個盃。好似雷丁，今季喺英冠放走部份主力後大跌watt，連領隊都炒埋，現排名尾3已經唔係最惡劣；反而看過佢哋對上兩鬥利記同迎般尼嘅英足盃，神勇地踢走兩英超隊，以盃賽谷起狀態並錄得聯賽3連勝。今次對手英冠「1哥」西布朗，正忙於同紐記在聯賽鬥放，下周中又要惡戰卡迪夫城；雷丁平手盤、單W同受讓[+1]視乎波友可承受風險，我個人會賭平手盤。
維拉高一皮硬水晶宮
周日，以態取波我選維拉，長期見穩，踢盃仔未出全力，但輪換制下反而令出場嘅副選有爭勝決心；作客到連射手域陀摩西斯也賣走的英冠水晶宮，後者上一圈靠老將畢打菲特入3粒氣走狼隊，今場對級數高得多嘅維拉，冇咁好命咯。
近5場往績：WWLLLL
蘋果波神
簡介：一分耕耘一分收穫，難得半夜睇波娛樂兼備，人生一樂也。捧愛隊可以好主觀，但若能客觀地從足球直播欣賞對戰雙方的表現，你會發現不少投注寶藏，啟發投注靈感。