周六英足盃賽事，個人會挑選英甲修咸頓挑戰英超樸茨茅夫賽事下注。樸茅近來風雨飄搖。負債水準高過姚明，傳聞連電費都冇錢交，練習場瀕臨截電。又被控逃稅過千萬鎊，官司纏身，萬一打輸，隨時清盤「影都冇埋」。滿以為會成為伯明翰第二，由香港老闆打救，點知臨時班主無意接收爛攤子，但求盡快趁反彈沽出持股。
表面上樸茅因為財困，理應士無鬥志，早排又被曼聯蹂躪，玩弄於股掌之間，難免令到觀眾看淡，寧願博對家。但觀乎樸茅近幾場的表現，除對曼聯一役外，並非太離譜。至於修咸頓，其實與樸茅同屬「天涯淪落人」，離開英超後，亦是久沉不起，連英冠席位也不保，同樣是非常五行欠水，背負3,000萬英鎊巨債。
樸茅爛船有三斤釘
以人腳而論，樸茅爛船都有三斤釘，占士、烏達卡、柏巴迪奧普和賓希姆，同屬國腳級人馬，與修咸頓的無名之輩，級數大有分別。此外，樸茅眾球員也有失業危機，加上市道麻麻，為長遠計，也會求表現打好比賽。例如占士寧願取消自動續約，以求出場機會打世界盃。一為神功，二為弟子，橫掂都係，就博贏個足總盃大家有糧出。始終都係英超對英甲，樸茅表面有瑕疵，亦冇理由買對家，反而趁壞消息入貨，這一場客W可作重心。
較大注碼捧樸茨W之外，撥出部份注碼。一早守候伯明翰斷纜訊號，今次周中不敵韋斯咸，要正式開始博對家，伯明翰本身不算強，銳氣一洩，可能會有一段低迷日子。另外周日賽事中，以熱刺較吸引，本身一向較有戰意在盃賽揚威，作客護級的保頓，1.95倍W已ok。
黃國英
簡介：本港著名股評人，正職豐盛金融董事，曾在多份報章撰寫股票專欄，同時是標準球迷及馬迷，喜以值博率角度推敲賽事，談一談賭足球心得。