市建局以十六萬元向商業電台買airtime，請發展局局長林鄭月娥做節目主持，一連四個星期六開騷。此事是否市建局主動擦局長鞋，還是被稱為打得嘅林鄭示意，佢做騷，市建局會鈔，天曉得。本來市建局重建政策，屬公共政策範疇，政府有個香港電台，而香港電台對烽煙節目，論壇節目，訪問政府高官，最有經驗，只要林鄭肯主動安排，唔信香港電台膽敢抗拒。
市建局、林鄭不作此圖，捨港台而向商台買廣告時間，聽聞令港台非常不滿，一位高層更向左丁山大發牢騷，指特區政府已眼中無港台、把港台踩到為腳底泥，港台雖然已經投晒降，政府還是覺得「家花那及野花香。」左丁山笑佢：「明年有多個雄濤，你哋更加死得！」此話並無幸災樂禍之意，港台宜及早注意，安排後事。
雄濤乃鄭大班牽頭籌辦之電台，據講預定年尾試播，為咗測試數碼廣播，鄭大班訂製咗一大批數碼收音機，送畀港島朋友試聽，呢個收音機可收聽本港現有電台，與雄濤幾個頻道，雄濤頻道全是音樂台，有懷舊金曲、流行曲、古典音樂等等，開住收音機全日聽音樂，幾盞鬼。據聽過嘅朋友報告，不知是否初期試播，聽古典音樂頻道聽到不少回音，影響音質，將來必須改善至得。
明年雄濤啟播，鄭大班必定全力搶廣告與搶高官訪問，你話佢有冇競爭力呢？大家都唔敢睇低，以鄭大班過往之節目作風，他日必定與商台直接競爭，以民生政治問題做主打、以財經節目為輔，與商台風格相近，佢嘅舊波士，肯定有排頭痛。
香港能否容納三個商業性質嘅電台，冇人敢話得定唔得，從過往數字睇，每年電台廣告（總支出）嘅增長似有若無，十幾年來個餅冇乜大到，開多一個商業電台，呢個市場好易變成一個零和遊戲，如三家分晉，原來兩個電台睇吓損失多還是損失少而已。兩位電台女強人W姐與B姐大戰鄭大班，肯定有好戲睇。