年卅晚最愛逛花市，偏偏維園攤位多人更多曝光率更更多。不妨轉戰旺角花墟和荃灣。今回兵分兩路，先有潮藝娛樂狄易達、啤梨和范萱蔚三人行，結果遇上末代會考巿場勁多學生哥！再跟荃灣地膽掃場，竟遇上情人節宅男恩物?!今回評分怎可能不是五星星？
記者：蔡俊業
攝影：陳盛臣、譚盈傑
模特兒：Norain@PureModels
葉文輝（啤梨）
要開工，但實同嫲嫲拜年，食佢整嘅湯圓，無料但超甜，係全世界最好味！
狄易達
我都做過豬年花巿老闆，可惜蝕本離場！
范萱蔚（Percy）
以往都會同爸媽旅行度歲，今年獨留香港同朋友打牌敍舊！
MK花墟末代會考巿場
未知是否鄰近學校區，旺角花墟穿校服的同學仔零舍多，採訪期間剛巧為放學時間，一堆堆學生魚貫入場，連同場內負責看舖的同學們、由老師帶領參觀的幼稚園學生們，都令整個花墟公園盡是青春學生人潮！眼見一批批落力叫賣的學生，勾起狄易達的中學生涯回憶：「預科時試過同20幾人去維園擺檔，嗰年係（迎）豬年，我哋設計咗件豬斗篷去賣，但嗰年天氣好熱，好多都賣唔出！」說到中學以前，做過老闆的狄易達反而無乜點逛過花巿，眼見一班班幼稚園鴨仔團，狄易達說：「細個無行花市，但老師帶我哋行惠康！」吓，咁都得！
一如往年，花墟公園的乾濕貨約各一半，除例牌「虎進金來」食生肖產品外，小記反而最欣賞實而不華的「會考巿場」及看得范萱蔚心花放的名副其實「心花放」！
街訪
蔡小姐
「一家20幾人年年都到花墟買桔同桃花，今日一口氣買咗6盆桔2棵大桃花，花了4千元。」
林灝天小朋友
「放學後同媽媽行花市，成功拖了一隻識飄嘅恐龍返屋企。」
（左起）Maryknoll葉、袁及岑同學
「對年宵公仔唔感興趣，因為唔實用。放學嚟花墟行吓啫。」
話題會考 最啱時候
都話明多學生哥，場內點會無學生用品？今年中學會考係最後一屆舉辦，一行30多人就決定以此題材在花墟擺檔，出售以會考為設計概念的文具用品。早前一群曾經歷會考的「八十後」青年，也以末代會考作產品設計概念，如試題答題簿及成績單文件夾等，引起侵權風波，觀乎這裏的套用會考口試常說的「What'syouropinion？」、「Iagreewithyou！」文件夾，應該Pass啩。
驚艷底底 冧女首選
全場最令記者Surprise的，一定是這檔「花店」？見到花，係女人都會心動，點知睇真啲，原來花瓣係由內褲邊造成，勁驚喜！搞到Percy非常開心，適逢大年初一是2月14日情人節，想冧女朋友，呢檔有得諗！
應景擺設 「虎」中作樂
時下年宵產品鬥設計鬥到七彩，由閩光書院的一班中六學生合力炮製的老虎公仔，決心打破生肖公仔通常只有一個Pose的悶局，在虎爪位置加上鈕扣，令公仔既可直立，也可伏低，陳設配搭百變無「虎」腦！還有其他得意「虎」中作樂或實用產品。
濕貨推介 疑似虎爪菊
掃完乾貨，他們仨都似乎想行桃花運。狄易達擺明想買桃花，而旁邊的啤梨即搭訕：「人哋話桃花要連續買3年，但我成日都唔記得係第幾年，結果就年年買！」桃花檔主葉生教路：「早幾日天氣暖，細細粒蕊等3、4日一定開，如果大粒少少，兩日就一定會開花，勉強仲趕得切過年。」至於桔，檔主歐生話，今年天氣反常影響收成，加上來貨價高，預計生意會較去年跌一至兩成。
荃灣沙嘴道濕貨集中地
荃灣沙嘴道遊樂場的年宵市場，以濕貨做主打，全個花市7條街得2條賣公仔玩具，縱合檔主意見，富貴棒、日本黃色百合、紅天霸百合、富貴籽、鉸剪蘭、乒乓菊等，都屬新興之選。其中位於103至110號舖的御花園，更名副其實令人花多眼亂，如日本紅蘭、紫色愛麗斯等更是少見。不好此花者，也有彼花，記者同地膽模特兒Norain一樣發現花以外的驚喜產品！
爸爸滑鼠墊 港男必買！
遠遠見到唔知係乜，近望先知道原來係BraBra滑鼠墊！檔主話，呢件產品由佢哋成班朋友一齊設計，對Bra就係重點所在，中間波罅位可用來墊住手腕，金髮Model就係滑鼠板，Norain試過都話好舒服。仲未夠，原來反轉個Bra，入面係塊Mon抹布，相當貼心，情人節冧仔及宅男必買！（168號檔）
apm室內免食風
忽爾熱忽爾冷，連續第5年舉辦室內年宵市場的apm，毋用日灑雨淋最好行。這兒大部份產品都是本地年輕人設計，有咩好買？立即睇睇！
