賣花只會讚花香，從來發展商只會唱好樓市，前幾日，長實（001）執行董事趙國雄居然唱反調，話本港樓價升勢有啲唔尋常，可能會出現調整，仲提醒市民留意樓市泡沫。敏妮翻查過，由98年至今，長實主席超人李嘉誠對樓市嘅評論唔少，但唱淡樓市就唔係好覺，頂多係01年初開聲叫過停建居屋，今次佢嘅手下居然公開唔睇好樓價走勢，背後有乜玄機？
地產界睇淡樓市嘅，頂多係地產代理喺樓市悶局時，造好唔得就唱淡，希望幫買家向業主壓吓價，促成交易之餘，自己亦都賺到佣金。至於發展商唱淡，似乎對自己冇乜好處。
敏妮印象中，趙國雄係一流推銷員，每次推盤佢都粉墨登場、扮鬼扮馬，唔使俾咁多廣告費都可以博到見報，幫老闆慳唔少。所以今次佢唱淡樓市，可謂相當弔詭。敏妮問過一個地產界嘅前輩，佢都百思不得其解，「可能係佢哋近期冇盤推，但遲啲都要推盤，冇理由唱淡。」
自行降溫效用不大
由於今個月底，有幅將軍澳地皮會拍賣，所以有人估趙國雄想先行唱淡樓市，為市道降吓溫。亦有人認為，好似內地咁，樓價太過唔理性，遲早會逼到政府出手壓一壓，財政預算案就快出籠，最好趁家陣先自行冷卻。
不過，要冷卻樓市，除非係各地產商不約而同玩大合唱，否則只係得一個人solo，效用有多大唔使講，所以究竟今次發展商唱淡事件，背後有乜玄機，大家要動吓腦筋。
敏妮有很多朋友都計劃置業，但由於樓價不斷咁飆升，所以仍然停留喺「計劃」嘅階段，未有實行，今日係年廿九，敏妮預祝有心置業嘅朋友，虎年心想事成。
http://wanmanli.com/blogs/