29歲的鍾欣桐（阿嬌）近日先後與向華強大仔向佐，以及同門師弟陳偉霆傳出姊弟戀，但剛與陳偉霆甩拖的楊穎（Angelababy）前晚出席首映禮時，竟公開直指陳偉霆與阿嬌唔襯，言語間酸味氾濫。向氏一家更齊心為緋聞斬纜，繼向佐孖住女友Race發表拒愛宣言後，前晚向太又揚言「唔好利用我個仔做宣傳」。令阿嬌在情場路上連環滑鐵盧。
鍾欣桐去年復出後，單飛發展未見太突出，反而在情路上繼續精采。近日她拍攝新片《前度》，先後與片中兩位男演員、25歲的向佐及24歲的陳偉霆（William）傳出姊弟戀。奈何神女有心，襄王無夢。虎年未至，阿嬌接獲的都是假桃花。
去年3月阿嬌與麥浚龍的姊弟戀玩完後，最近傳她翻撻剛和Angelababy分手的同門師弟William，前晚Angelababy在會展出席《花田囍事2010》慈善首映時，提到William和阿嬌的緋聞不禁醋意大發，刻意劃清界線地說：「唔關我事，我哋係普通朋友。我呢排好忙，冇時間takecare啲咁疏遠嘅朋友，要關心都睇吓係啲乜。」會否覺得William與阿嬌相襯？Baby竟毫不客氣說：「講真，唔覺得襯。」是否與她較合襯？她則笑說：「哈哈，唔好強求。」
William：冇諗過撻佢
阿嬌雖是William師姐，但前晚William於將軍澳電視廣播城錄影《勁歌金曲》時，也公開強調對阿嬌冇愛意：「冇撻過點翻撻呀？佢係我師姐，亦冇諗過撻佢，之前只係拍電影，大家要投入感情戲先傳緋聞，拍完就冇。」是否年紀比自己大因而冇機會撻着，他說：「年紀唔係限制，最緊要大家溝通到。我入公司7年，同佢好朋友，我第一個MV都係佢拍。」
這邊廂的過氣情侶Angelababy和William聯口反阿嬌，那邊廂的向佐與父母向華強夫婦前晚到又一城出席電影《蘇乞兒》首映禮，問向太有否為囝囝與阿嬌的緋聞激心，向太也跟兒子同一陣線隔開阿嬌，向太說：「部戲都未上畫，唔好利用我個仔做宣傳，唔知邊個作出嚟，佢只係客串三日戲，如果唔係電影公司話幾好叫拍，就冇事發生，家個細佬（向佑）都成日話阿哥人氣No.1，好多相喺網上，不過啲相都係劇照，都唔知係咪杜文澤擺上網，都冇乜嘢吖，又唔係真，所以唔會嬲。」
向太爆阿嬌撩仔傾偈
向太續說：「我個仔又唔寸又nice，第一日拍戲時阿嬌就同我個仔傾偈，話以前你阿媽好惡o架，乜嘢人都鬧，唔知鬧乜，自從佢鬧陳冠希後先明白你阿媽好有義氣，好崇拜你阿媽，我都成日同個仔講，唔好理人乜嘢出身，唔好睇唔起人。」
其實阿嬌踏入2010年後是非纏身，兩單緋聞損手爛腳，早前還傳她曾出入誘騙o靚模性交而被判監的茅山師歐陽國富的寓所，還是歐陽國富的契女。本月初她與擔任代言人的ToughJeansmith又約滿，至今阿嬌尚未就上述傳聞親自作出任何回應。阿嬌4月將與拍檔蔡卓妍合體舉行Twins紅館演唱會，且看她能否趁機一洗頹氣。
採訪：陳月萍、張俊銘、王崇穎
攝影：陳順禎、陳志嵐
有情歲月：愛情路多坎坷
阿嬌自從前年爆出淫照事件，事業停頓近一年，去年初才慢慢復工，總算重新振作，不過她為愛情受傷卻從沒停過，相當慘情。
緋聞男友：麥浚龍
簡介：淫照風暴08年頭爆發後，Juno一直對阿嬌不離不棄，可惜後來有指因阿嬌接受《志雲飯局》訪問時直認最愛陳冠希而傷透Juno心，二人於去年3月分手。
緋聞男友：陳偉霆
簡介：阿嬌盛傳與剛和Angelababy分手的同門師弟陳偉霆因合拍新片《前度》而撻着，陳偉霆卻表明一直視她為家姐，從沒想過跟她談戀愛。
緋聞男友：向佐
簡介：同樣因合拍《前度》而傳出緋聞，有指阿嬌狂傳短訊給向佐表明心迹，甚至從Race手上強搶男方，但向佐公開表明阿嬌只是朋友關係。
資料來源：《蘋果》資料室
