市況一時扮死、一時扮勁，放假前趁美金稍回就大挾，連報紙都話淡友部署重倉，畀我係大戶都揀今日挾啦。熊掌食過就算，補咗裂口係咪可以扶搖直上？成交一關仲未過，睇怕要春節後至見真章，先祝大家虎年行大運。
美國聯儲局首次出口術講退市，遲吓至加息，仲有希臘有歐盟認頭撐腰，美滙指數見過80樓上後腳軟。美元自去年11月反彈，累計升幅8%；恒指從高位23099回落至19423，跌近16%；金價由去年12月初1200美元樓上跌穿1080美元，亦跌14%，可見美金反彈嘅殺傷力有幾大。
美金反彈浪已成，無謂再估彈幾耐，問題係點樣喺佢反覆向上嘅上升軌當中掘金。簡單講，要趁美金回買股、趁美金彈沽貨。大家只要開個美滙指數圖，攞把間尺，唔使兩秒就畫出通道，出市入市冇難度。唔少人以為美元反彈浪差唔多，但恒生馮孝忠唱反調，話美元只係扭吓計，喺歐元仍偏淡下，冇乜條件畀美金大插。所以未來幾星期，美滙反覆下跌可能返落78至79，即係上升軌底部，到時若跌穿，股價仲有運行，唔好沽住。
綠色資源後台硬易掘金
睇金價都一樣，1020至1030美元應有支持，除咗期金，金股同資源股都會繼續有唔錯反彈。剛變身嘅綠色環球資源（061），將會喺蒙古採鐵礦同金礦，佢南面有南戈壁（1878），老遠嘅西邊有蒙古能源（276）。公司管理層好有信心咁話，今年7月開始投產，而且佢位置最近當地鐵路，兩三個鐘車程就到。點解咁筍？因為佢拍檔係中鐵（390）旗下中鐵資源附屬公司，並已承諾興建鐵路直駁當地唯一連接中國境內嘅鐵路，幾年後用得，中鐵資源仲會買起晒佢嘅鐵礦砂。
急口令都有話︰「掘金、掘桔、掘雞骨」，其他變身股可能真係只掘到個桔，但相信有大國企撐腰加名人管理層背景，真係掘金嘅機會高啲。股價已回落到12月嘅1.68元配股價，可作入市參考。
胡孟青