大市又挾升，成交少得可憐600億銀唔夠，你以為淡友被挾，其實可能係好友聯手挾爆發行商。大炒友噚日不知幾開心，話個市易炒，只需簡單技術分析就得，總之手持牛熊證，睇住19700同20000點，日中就可捕捉小波幅炒好幾轉，尾市實行埋單計數今日再嚟過。
朝早開市頭30分鐘，往往係炒友入市同坐過夜等出貨嘅時候，近日成交閒閒哋佔大市三成有多，無論買入定賣出，發行商都要喺現貨市場做嘢，個市有乜辦法唔波動。好嘞，食完晏返嚟，三點三茶餐時間亦好緊要，冚旗嘅冚旗、贏錢嘅攞錢走，決定坐過夜嘅亦喺呢個時候開始做。正因炒友越嚟越狼死，出出入入搞搞震冇幫襯，發行商惟有縮沙，將牛證溢價縮得就縮，由正縮到變負，負完再負多啲，務求減少損失。
大摩：中國報少GDP
即市要發新年財就要多花功夫，耳聽八方，中長線投資者就要睇大趨勢。大摩同高盛連日發表對新興市場嘅睇法，兩間行都係中國大好友，高盛話中國唔使20年趕上美國，2050年稱霸武林；大摩亦好樂觀，70幾頁報告具體分析幾個新興市場經濟，主題係短線有調整，長線繼續睇好。
兩份報告一拍埋，單睇頁數，大摩就比高盛多近兩倍；至於內容，大摩冇話你知「阿媽係女人」──中國會成為強國，反而好具體咁講到明大陸幾時會加息、加幾多、對市況影響有幾大、股市要見幾多倍PE至見底。基本上，大摩認為區內股市今年先低後高，當中國喺4月開始加息，市況將會急轉直下，情況就好似04年宏調，當時恐慌情緒將大市預測PE，一度推低至不足11倍。所以大摩話以現時13倍嘅PE，確有下調壓力。
反彈市潑冷水未算大膽，報告仲話由於內地統計數據唔完善，令住屋、消費等數據被嚴重低估，按佢估計，GDP起碼報少咗1.25萬億美元，當中官方話消費開支只佔36%，但實情可能高達50%，唔係點會做到全球最大汽車消費國。一針見血，應讚要讚，希望MSCI指數今年真係可以如大摩所言，最少升22%、最勁升80%。
胡孟青