即將公佈財政預算案嘅財爺鬍鬚曾，講明唔會派糖，不過佢噚日就宣佈會派兩份禮物畀香港人，就係兩隻澳洲特產樹熊。南澳洲政府答應兩年內送一對樹熊畀香港，由海洋公園收養。阿媽教落，唔好立亂收人禮物。樹熊乃係蜚聲國際嘅大食懶，八方研究過，一對樹熊嘅伙食費，一年大約要400萬元，要香港市民同遊客供養，條數都幾襟計。
南澳洲省省長雷恩噚日出席香港駐悉尼經濟貿易辦事處新春酒會，公佈送贈一對年幼樹熊畀香港。樹熊落戶香港有段古，話說鬍鬚曾08年探訪南澳考察紅酒業，旅程途中見到一對野生樹熊，覺得好鬼得意咁話，同南澳副總督黎文孝見面時提起，如果可以整番對嚟香港就好喇。
每年使費約400萬
黎文孝好嚴肅咁跟進鬚鬍曾要求，上年訪港期間，走咗去海洋公園視察，相信養死三條中華鱘嘅海洋公園好適合樹熊棲息，於是玉成鬍鬚曾願望。據知南澳會送出一雌一雄樹熊，有機會喺香港開枝散葉，最遲2012年抵港，如果鬍鬚曾有機會做特首，咁對樹熊正好係佢上任賀禮。
樹熊人見人愛，米奇老鼠今次有壓力，但正如經濟學大師佛利民話齋，世上並無免費午餐，人出樹熊，海洋公園出「豉油」都好和味。首先，園方要安排員工去澳洲受訓學湊樹熊；其次，要安排一個空調展館養樹熊，溫度指定要攝氏10度至25度，仲要喺大陸搵尤加利樹葉供應場，作為樹熊嘅食糧。
香港從來未有動物園養過樹熊，廣州香江野生動物世界同日本嘅大阪動物園都有樹熊睇，不過大阪嘅樹熊唔係太受歡迎，原因係動物園飼養六隻樹熊嘅成本每年大約1,200萬港元，因為尤加利樹葉好貴。以此計算，海洋公園養一對樹熊，每年使費大約400萬元。
遊客到澳洲嘅動物園可以抱樹熊，不過澳洲政府卻規定國外動物園唔可以俾遊客抱樹熊，需知抱抱樹熊係好多澳洲動物園重要收入來源，唔係台灣宅男女神瑤瑤嘅抱抱會咁免費任抱，海洋公園唔可以靠呢招賺錢，點樣維皮？聰明嘅讀者一定諗到。
mailto:[email protected]