民主黨喺維園年宵個民主檔噚日開張，主席何俊仁，兩個副主席卿姐、單仲偕及多個兄弟撐場。今年特別多人玩政治揮春，民建聯張「禮儀廉」揮春更加千金難求，原來唔止民記被人玩，民主黨都有類似情況，仁哥同八方講，有人要求佢寫「打倒共產黨」，佢覺得新年流流唔好殺氣騰騰，所以婉拒寫呢五個字，強調唔係政治審查。
曾鈺成唔敢寫起義
今年華叔抱恙唔方便幫市民寫揮春，仁哥同楊森、張文光輪流當值做「寫字佬」，仁哥話早一日喺維園寫到深夜先收筆，企到腰痠腳痛，要戴腰封先可以繼續紮穩馬步寫字，可想而知堅持年年落區寫揮春嘅華叔有幾捱得。
立法會主席曾鈺成早前幫街坊寫「五區公投」揮春，八方以為佢真係咁順德人，實情原來唔係，噚日有記者要求佢寫「全民起義」，曾主席即時耍手擰頭，指記者攪局，起義唔寫得，寫普選兩個字得唔得呀？曾主席都話唔好，十分惜墨如金。