政圈潮興玩facebook，工聯會理事長吳秋北都有個戶口，方便同會員溝通。八方以為工聯會會員都係老餅居多，佢哋統計後發現，現有341,000個會員當中，原來七成係40歲以下，既然中、青年成員眾多，理事長都要與時並進玩facebook。
不過會長鄭耀棠冇咁in，冇玩facebook，吳秋北笑言可以教棠哥玩，或者幫佢開個戶口先都得。工聯會去年初定下目標，希望會員人數達34萬人，現時達標有餘，吳秋北交足功課，棠哥強調有交會費先計數，所以條數絕冇水份，今年目標係希望年底會員人數達35萬人，佢話好有信心達標。