賭王何鴻燊去年7月入院，至今只曾喺12月旋風式出院一日去澳門見證回歸10周年，賭王一直扭計好想出院過農曆新年，但始終都要聽醫生安排。
賭王三位太太每日輪流進出養和探病，不過噚晚9點半後，短短20分鐘內二太藍瓊纓、三太陳婉珍同四太梁安琪，夥同部份女兒先後探病，三房聚首病房，惹嚟佢哋接賭王出院傳聞。
大約10點幾，三太臨走向現場記者擰晒頭否認賭王出院。八方好關心到底三房齊集喺病房搞乜，於是打畀四太八卦吓，佢話：「我哋每兩星期都會約埋一齊講吓賭王近況，聽吓醫生報告，賭王近況好好。」咁係咪可以出院？四太話：「因為呢幾日又凍又濕，睇定啲先。」賭王仔仔女女遲啲都返晒嚟同爹哋食團年飯，如果賭王仲未出得院，就輪流分段上病房食。