香港戲院商今年會趁春節將票價加5蚊，到過年後又會減番，由今日至21號，百老匯、UA、嘉禾同MCL院線都會調整票價。百老匯院線發言人陳小姐話：「由上年開始，幾大院線都有喺新年加5蚊票價，但新年後會減番。」嘉禾院線發言人都話過完年就減番價。
志偉放佘咬甄子丹
曾志偉嘅《72家租客》噚日又大堆頭去奧海城宣傳，講到甄子丹日前暗踩《72》同《花田囍事2010》係胡鬧片，單手都打贏佢哋，志偉反擊話：「部戲佢係用兵器冇用手，我哋求其搵把口都贏佢，搵條佘（佘詩曼）出嚟都得，香港冇對手，係得黃百鳴，因為我哋都同樣每日八場，其他只得三場。」志偉仲話會去《花》片首映踩場。而同場嘅梁政珏宣傳之後除咗大會tee，急不及待露背突圍。
王祖藍之後去到尖沙嘴為佢間糖水舖主持開張儀式，好友李彩華、小虎隊同杜麗莎等撐場。祖藍話間糖水舖早排已開始試業，可能唔使一年回本。黃宗澤噚日就接受商台電話訪問，自爆親自搵女友胡杏兒客串《72》，杏兒驕人上圍嘅造型亦係杏兒自己度，唔關佢事。
《72》同《花》片同期上，無綫梗係幫番自己有份投資嘅《72》啦，所以《花》片演員古天樂、吳君如同鄭中基惟有上有線煮餸谷宣傳。