【本報訊】六四事件後被禁足內地的司徒華，自從患癌消息傳出後獲多名建制派人士力促中央向他發還回鄉證，以便實現到內地一遊的心願。癌病在身的華叔昨天再斥相關人士「貓哭老鼠」，踢爆有關人士在他患病後從未予以慰問，表明不會在此安排下返回內地，但不表示他從此永不踏足內地，華叔強調中央若承諾讓他回國探望被政治重判的異見人士劉曉波及譚作人，「我帶住病都要去！」
記者：許偉賢 林俊謙
保安局前局長葉劉淑儀及醫學會前副會長史泰祖等建制派人士早前指出，中央應向華叔發還回鄉證，讓他到內地遊覽。早已怒斥有關人士「貓哭老鼠、政治抽水」的華叔餘怒未消，昨天在短短半小時的記者會上，特別抽時間主動提及相關問題。
他不點名指最近有人稱要為他取回回鄉證返回內地，嚴正指出「咁樣我係唔會去」。繼而為重新踏足內地開出條件，直指「但假如佢係應承俾我返去探望劉曉波、譚作人，咁我就一定會去……我帶住病都要去！」
華叔回應記者有關發還回鄉證的提問時再次批評有人「抽水」，稱20年來一直未有回鄉證，其間早已表示有意到內地遊覽，「點解佢哋一路都唔講，直到家先至講？係咪諗住我就快死，所以叫我返去參加？」並質疑：「佢哋知道家好多市民關心我嘅狀況，所以好似表示一啲好嘅態度；但我聽佢哋講呢番說話前，冇一個人打電話或者寄卡慰問我。」
葉劉怕再被指抽水
成為矛頭所指的葉劉淑儀及史泰祖昨日在華叔召開記者會前一小時，同樣於維園舉行年宵攤檔開幕儀式。被問及對華叔批評有何回應時，葉劉淑儀形容事件是「誤會」，強調史泰祖當日提出向華叔發還回鄉證，只是出於「醫者父母心」，力指自己與史均無意抽水，嘆稱「人哋唔領情，我都唔想多講。」既然近在咫尺，有記者問她會否到訪支聯會攤檔，葉劉淑儀即以「忙於招呼朋友」為由拒絕，但不諱言「我過去，都驚俾佢話我抽水啦。」
雖然曾被華叔指摘抽水，但當被問到華叔欲到內地探訪劉曉波及譚作人時，葉劉淑儀仍然予以支持，認為特區政府應向中央轉達有關意願，指「喺華叔立場呢個係完全合理」。
譚耀宗：會反映吓
身兼全國政協委員的民建聯主席譚耀宗則指「會反映吓」華叔的要求；但至於有關要求是否合理以及取回回鄉證的機會有多大，譚耀宗只稱：「我唔想評論。」
政制及內地事務局局長林瑞麟昨承諾向內地當局反映協助華叔返回內地的問題，但同時補充指有關內地出入境的安排，是由內地當局按照其法律處理。
公民黨黨魁余若薇則認為包括華叔在內的所有無證人士都應取回返國權利，力促中央和特區政府履行責任，「還華叔同其他人回鄉權。」
支持者心聲
癌病並不可怕
張先生 退休人士
「我以前喺大陸受過迫害，所以好支持民主，支持支聯會，我特別由九龍過海嚟支持華叔。華叔加油呀！我以前都有癌病，家醫好咗。冇嘢o架，你唔使驚佢，開心囉，癌症一樣有得醫o架！用平常心對個病，唔緊要o架。」
願六四得平反
周小姐 中學生
「媽咪一向有同我講六四，由細到大喺電視度見到華叔參加好多政治活動，我覺得華叔一直好努力去平反六四，如果華叔有生之年可以完成到呢件事，大家都會好開心。本來好快就有普選，家又推遲咗，好可惜。」
敬佩造福後輩
黃先生 退休人士
「我想睇吓華叔風采，睇吓佢健康點。華叔好值得敬佩，堅持民主，造福後輩，好少人做得到。希望佢健康，早日遠離病魔。平反六四，下一輩一定睇到，呢個係歷史嘅問題，歷史一定向前，希望我哋都睇到啦！」
祝福身體健康
梁先生 教育業
「今日我特登嚟維園買華叔寫嘅揮春，睇吓可唔可以見到佢。最初聽見佢病都有啲擔心，但今日見佢精神都同以前差唔多。華叔為呢個民主運動做咗好多嘢，好擔心佢第日唔喺度，其他人會唔會繼續堅持，衷心祝福佢身體健康。」
影響民主運動
陳先生 傳道人
「華叔對香港民主運動真係好重要，好有影響力。我每年都有參加六四燭光集會，無論佢喺唔喺度，我都好希望市民不斷關心平反六四呢件事。雖然生死有命，但都好支持華叔，祝佢早日康復，相信神自然會有安排。」
難得堅不變
孔女士 家庭主婦
「聽到華叔有病時都好擔心，個心有啲唔舒服，所以今日特登嚟維園睇吓佢、見吓佢，希望佢病情快啲好番，好開心見到佢精神好好。佢對平反六四咁多年嚟咁堅持，好難得，我今年都一定會參加六四燭光集會支持佢。」
