謝瑞麟（417）噚日宣佈職位變動，黃岳永辭任行政總裁（CEO），改由主席邱安儀兼任。黃生辭職理由係要投放更多時間喺個人事務，但奇怪係公司話黃生仍會擔任副主席同執董，亦繼續負責香港門市營運。同時，公司委任咗陳立業做首席營運總監，上述變動全部3月1日起生效。
今次咁嘅安排，黃生離開公司係遲早嘅事。佢唔做總裁，人工可能要減。但錢對於佢嚟講，可能有唔同意義，事關佢舊年參加港台真人騷《窮富翁大作戰》後有新體驗，佢親身落入凡間，喺深水埗板間房住咗5日，日頭仲要去慈雲山「返工」做垃圾佬，幫屋邨倒垃圾，親身體驗低下層生活。
事後佢話計劃參加社區組織協會辦嘅啟蒙天使計劃，希望幫啲深水埗貧窮家庭小朋友成長。