香港人對電視劇又愛又恨，無記一台獨大自我複製垃圾劇集，套套鬧人套套摑人套套爭家產，有說睇得多人會變蠢，但結果，觀眾邊睇邊鬧收視邊創新高！縱然《大長今》曾高收50點，縱然千禧年間日韓台劇相繼入侵，但港人始終最愛港劇；Click上維基百科，發現原來過去十年，無綫亞視有近280套劇集播映，要選十年十大，最理想方法當然由街坊觀眾們票選！
記者：蔡俊業
攝影：楊錦文、王文忠
illustration：StellaSo
十個我最喜愛角色
如妃娘娘
咁紅，但你叫得出佢全名咩？鈕祜祿．如玥。
柴九
電視撈飯，最緊要活得痛快！
大契
患癌仲可以苦口婆心講足4分鐘戲阻阿仔鬧離婚，邊個夠佢勁？
LaughingGor
死後掀起Facebook悼念熱潮呀！
唐亦琛
「唐亦琛」一時唔記得？《衝上雲霄》吳鎮宇飾的蛋撻頭Sam哥囉。
馬小玲
火野麗SailorMars都耍佢嗰招！
莫作棟
《棟篤神探》黃子華，誰能代替？
初哥哥
張智霖雖由初哥哥變初爸爸，但童顏未改。
賤Man
謝天華包攬兩角，LaughingGor外還有《女人唔易做》。
四奶奶
得不到視后支持者就上街示威！
第1位 《畢打自己人》（2008-2010）
監製：曾勵珍、羅鎮岳
最高收視：30點
老實講，這套劇奪首位有點意想不到，相信與播出超過330集，日日睇開有感情有關，更重要是，劇中有我們都懷念的大閆生陳鴻烈。但得罪講句，這套劇內容頗無聊，而且兩大敗筆，雜誌社租畢打街寫字樓？身為行家的小記未曾見過一家雜誌社可以像劇中般File陳設整齊？不過，話又說回來，如網友Waiting話齋：「處境劇得嚟，啲三四線做戲都唔錯，加上追漏咗都睇得明。」
第2位 《我和殭屍有個約會》（1998-2004）
監製：冼志偉
最高收視：20點
一套無綫不敢開拍的新品種劇集，造就亞視創造這十年唯一驚喜。當然記得馬小玲那條比月野兔更短的戰衣裙，還有況天佑（尹天照飾）和將臣（任達華飾）在啟德機場，元神出竅變成怪獸飛上半空決戰，如果放在友台播放，這班殭屍不是互鬥速度，而是必須互相掌摑。更愛第二輯，有尹天照有萬綺雯有任達華有張慧儀還不夠，又找來謝君豪和貞子。就算華娛衞視或本港台自己第N次重播，一樣成為話題，這才叫經典。連反港劇的林奕華都讚劇本天馬行空得叫人心花怒放。
第3位 《男親女愛》（2000）
監製：徐正康
最高收視：49點
個人認為是近十年處境喜劇的唯一代表作。易明、好笑、對白精警，而且配搭新鮮，黃子華加鄭裕玲呢個組合去邊度搵？更重要是100集見好就收，唔好拖長嚟做。網友Hartmann：「男親女愛~~首歌好好聽……到家都記得……」
其餘好戲 排名不分先後
《十月初五的月光》（2000）
監製：徐遇安
最高收視：46點
知道了十月初五街原來是澳門的一條街，也唱好了《祝君好》及「初哥哥」，網友Tonia：「我認為呢套係TVB十年來編劇最出色劇集，入面每個角色都有故事，有令人心酸嘅遭遇，到家都會好記得當中劇情。」
《衝上雲霄》（2003）
監製：潘嘉德
最高收視：37點
Twitter用戶@siurekrek：「題材新鮮；捧到新人；當時成班宿生一齊睇；唯一一齣劇是我睇完電視播再煲碟睇；加上我喜歡旅行，呢套劇令我想做crew（andIfinallydidaftergrad）。」嘩，恭喜晒喎。怪不得此劇於08年重播時也創下深夜時段高收視紀錄。
《九五至尊》（2003）
監製：蕭顯輝
最高收視：46點
Twitter用戶@on8899：「我揀《九五至尊》，因為這是最有創意的一部。」咁又係，穿梭清朝與現代、還要背上雍正跟呂四娘的身份，大兜亂大把Gag位。
《金枝慾孽》（2004）
監製：戚其義
最高收視：41點
金牌監製，也翻叮了七十年代久違的趕回家追劇「狂潮」。網民Ricky：「十年來我只能選《金枝慾孽》，因為劇本真係有度過，對白運用得宜，加上食中香港人對勾心鬥角的熱愛，雖然不是新鮮嘢，但可以從既有章法上有變化都算係咁。」
《女人唔易做》（2006）
監製：潘嘉德
最高收視：41點
單是戲名已Hit中電視劇的最大觀眾群，而且現代感十足。中女發現丈夫有外遇，再而玩起姊弟戀；另邊廂的女強人的情愛程式卻是考慮借種生子，估你唔到最後懷孕誕女。
《溏心風暴》（2007）
監製：劉家豪
最高收視：48點
連天都幫佢！海味店大家庭的一場爭產風暴，遇上龔如心病逝及爆發現實版爭產風波，自然更具話題性。不過，都未及「呢度唔係法庭，唔需要證據」、「邊個係人，邊個係鬼，我睇得出」咁爆。
《巾幗梟雄》（2009）
監製：李添勝
最高收視：47點
當年《金枝慾孽》視后寶座輸給黎姿，想起黃偉文一句得獎金句：「我寧願攞唔到獎有人覺得唔抵都好過攞到有人覺得唔值！」今番吐氣的不只鄧萃雯，也是黎耀祥苦盡甘來之作，但個人總覺得不如坊間說的好。或者真係要如頒獎台上幾乎每個演員都講的「多謝李添勝」，令我更深思人生有幾多個十年這句老套話。
百人公投
陳淑莊唔撐？
今次的票選方法由街訪＋網上收集意見兩部份組成。記者先後到過理工大學、黃埔花園及中環街頭進行街訪，再而於Facebook及Twitter徵集意見，前後共收集了100名觀眾的意見，過程雖未必科學，但已某程度反映普及意見。總結十年，得出十套最經典電視劇，而左列首三齣更是小記綜合各路邊社眾望所歸的頭三位。
陳淑莊（公民黨創黨黨員）
「港劇我仲停留喺《狂潮》同《網中人》年代。反而最近睇咗套韓劇叫《CityHall》，講一個女仔完全無政治背景，陰差陽錯之下走去選市長，佢好鍾意自己住嘅地方，又好投入去做事，唔計較，慢慢從錯誤中學習如何幫到市民，可能同我工作有關，所以睇落有感覺啦！」
Larry（中環友）
「睇完《衝上雲霄》，我真係有諗過做飛機師，只係考唔到！」
黃生、黃太（黃埔街坊）
「《金枝慾孽》編劇編得有心機，所有細節，起承轉合都做得好好！」
Bee（理大生）
「《女人唔易做》嘅Hilda姐好女強人Feel，套劇亦比較真實切合時代。」
Jonathan（理大生）
「《溏心風暴》大契表現到顧全大局精神，對大學生嚟講學識睇嘢要宏觀啲，長遠少少。」
胡小姐（中環OL）
「我鍾意第二輯《家好月圓》多啲，啲人拗得勁啲，古仔劇情豐富啲。」
洪太（黃埔太太）
「柴九同四奶奶都演技好，可以做到角色人物的感情。」
梁小姐（中環OL）
「《巾幗梟雄》演員演得比較好，反觀其他劇集睇完都無乜大印象。」
呂小姐（理大生）
「唔睇港劇，會睇《Heroes》或者《House》等外國劇，覺得港劇橋段成日都抄外國劇，例如《法證先鋒》同《CSI》好似，但又抄得差抄得唔夠全面。」
網友Rudi
「最佳角色我會揀《阿旺新傳》演阿旺老竇嘅秦沛，我真係好憎無記成日都俾啲垃圾戲佢做。」
網友趙小姐
「如果只揀一套劇，我揀《無業樓民》（2000）。我個人好怕睇所有近十年嘅所謂重頭劇，因為劇本永遠頭重尾輕，有佳句無佳篇。」