由甄子丹、吳尊、徐子珊主演的《錦衣衛》前晚舉行首映禮，早前子丹公開表示睇好同檔期的《花田囍事2010》成為票房冠軍，未知是否怕長他人志氣，前晚他即補飛表示單手已可以打贏同期對手，還揚言票房可以贏足幾條街，更暗踩《花》片和《72家租客》是胡鬧片，自己就不會欣賞。
甄子丹、吳尊、徐子珊等前晚到黃埔出席《錦衣衛》首映禮，子珊穿上BCBG的低胸長裙示人，十分搶鏡。汪詩詩則盛裝捧老公場，子丹更體貼為她除下外套，露出裏面的性感吊帶晚裝，子丹風騷說：「有料俾人睇，收埋嚟做乜。」
自詡贏幾條街
早前子丹曾公開表示睇好同檔期的《花田囍事2010》成為票房冠軍，前晚他轉口風指《錦》片有一定質素，他說：「與同期對手比較，不論東南亞或中國，票房都可以贏幾條街。」
至於同檔期的賀歲片誰是最大敵手時，子丹即說：「片種唔同，最大對手都係喜劇，香港觀眾鍾意睇胡鬧片，好似《花田》同《72家租客》，我就唔鍾意睇胡鬧片，唔怕得罪黃百鳴講多次，單手都可以打贏佢，最終希望每部港產片都賣座，唔使畀《阿凡達》贏哂。」
由於《72》和《花田》兩片都有抄襲《葉問》中一打十的情節，所以子丹叫觀眾不要看翻版子丹，更講明應該睇真正的甄子丹主演的《錦衣衛》。
趙薇繼續冇影
此外，盛傳懷孕的女主角趙薇前晚繼續缺席宣傳，而李仁港導演則澄清他從未暗示過趙薇懷孕，同場的子丹和吳尊就表示雖然未知傳聞是否屬實，但都會祝福對方。
採訪：藍文浩
攝影：林德雄