有超過400萬名個人理財客戶嘅獅子行滙豐，有意搶佔中層市場，滙豐香港區個人理財業務主管麥倩華（圖）噚日話，本港有接近120萬個中層客戶，獅子行現時滲透率已貼近80%，實際上真正成為佢哋運籌理財客戶已過50萬，希望推出新優惠吸更多客。
為咗吸引呢批入場門檻至少20萬港銀嘅中層客戶，滙豐運籌理財英文名會由PowerVantage改為HSBCAdvance，噚晚仲特登喺獅子行中環總行內搞咗兩場鋼琴演奏同功夫表演。有新名就當然有新服務，除咗推出新嘅滙豐運籌理財白金Visa卡，今年第三季起，仲有環球賬戶同埋環球轉賬服務，一個網址可以查閱晒全球滙豐戶口。