聽日年廿八，洗邋遢，大掃除後，都係時候喺屋企佈置新年裝飾，貼年畫、揮春迎新年，八方提醒大家聽日記得早啲買《蘋果》，因為A叠會刊出「一筆虎」揮春（圖），貼起之後，全年都虎虎生威。
呢個虎字，係由被稱為「帝師」嘅晚清書法家翁同龢喺兩個甲子前，即係距今120年嘅庚寅虎年寫。翁同龢屬虎，中年之後經常大書虎字自勵，寫呢個虎字時正好60歲，當時佢正扶助光緒改革圖強，一筆而成個虎字寫得零舍神氣。
揮春上仲有近代名畫家劉奎齡1940年猛虎扇頁。劉奎齡係天津巨富「土城劉家」之後，南開中學首班畢業生，幼習郎世寧畫法，後鑽研明代呂紀、清代沈銓畫技，並將西洋畫之色彩、透視比例融合於中國傳統工筆畫之中，形成獨有風格。