大市忽然一挾，淡友即時投降。早段大市成交淡靜，淡友要舞高弄底易如反掌，成朝個市都係短炒客喺度狂炒輪同牛熊證，十大活躍成交全部清一色係Put輪同熊證，炒家都醒，知道引伸平用Put輪博大霧。港股呢兩日走勢非常有個人風格，之前一日人人唔跌佢可以一嘢撻落19400邊，噚日就日日唔升忽然喪挾300點，飄移過頭文字D，淡友冷不防又被挾手指。
高盛發表全球經濟報告，繼續做中國大好友，認為唔使18年，中國經濟可以睇齊美國，到2050年甚至係全球最大。立論嘅理據係中國內需非常強勁，特別係對消費品，令歐洲名牌個個滿載而歸，又超越德國成為全球最大輸出國，當中以汽車銷量最為人津津樂道，因為中國幾乎買起晒全世界嘅車。高盛仲預期中國今後幾年實際經濟增長可能超過14%，咁唔使等到2050年就可以雄霸世界。
高盛：中國40年內稱霸
經濟學嘅假設，通常都係基於「外在因素保持不變」，但有關預測似乎忘記咗中國刺激內需措施對消費嘅帶動。連高盛經濟師都話，中國數據的確有啲與別不同，計入咗政策嘅水份，千算萬算都難以將水份「蒸發」。嚟緊周四內地會公佈新經濟數據，聽市場重量級人馬講，通脹情況會令人跌眼鏡。放心，係好消息，預期通脹會較受控，即係中央收緊步伐可能放緩。其實中央數據向來都唔係咁科學化，似係為配合國策多啲，既然連高盛咁多「專家」都唔識睇，最佳亦係最簡單嘅自保方法，就係為數據打個八折唔好信晒，喺反彈市時適量減磅跳車，開開心心過年派利是。
板塊方面，高盛話金磚四國會繼續對汽車同電話有好大需求，特別係中國同印度嘅滲透率仍偏低，行業大有可為。又話2025年或之前中國將與美國睇齊，咁點解現時手機竟然唔係全面普及？
問題出於經濟體系嘅大細，根本同國民收入無關。中國人多經濟體系大，但貧富懸殊只會有增無減，大家咪以為中國最大就等於中國富強，如果唔好好改善城市化同土改問題，社會矛盾只會隨經濟起飛而升級。
胡孟青