黃毓民辭職後自動退任中大校董，民主派屬意余若薇頂上，點知建制派恃住人多勢眾，議員互選嘅話實夠票擸多個位，會計界陳茂波即時攝位話要入校董會，如無意外，呢個位係建制派囊中物。
有校友同八方講，現時民建聯陳克勤同自由黨張宇人係中大校董，餘下一席由泛民坐，對校政監察或代表性都較合理，若三席都係建制派，中大校董會咪變成一言堂？另一校友則指，波波間會計師樓早前同另一間行合併拓展生意版圖，新拍乸正是民建聯工商事務委員會副主席陳維端，家陣已有一個民建聯校董，再添一個與民記關係密切人士，啱唔啱數呢？
邀請兩人出席論壇
根據法例，校董由議員互選，學生無從過問，不過中大學生會堅持校政透明化，已邀請兩個「候選人」出席今個月25號舉行嘅論壇，希望佢哋向同學講吓對校政睇法，接受同學提問，可能即場請同學「公投」誰人做校董好啲，據講余若薇樂意出席，波波就反應一般。