傑志噚日公佈，繼阿蘭沙保後，搵咗前西班牙國腳中場施拉迪斯客串初四賀歲波外，仲透露賽事唔會有電視直播，但新城電台會現場直播，仲邀請咗何鑑江客串㖭。有睇開西甲嘅球迷應該對施拉迪斯有印象，因為佢係少數曾經踢過巴塞同皇馬呢對死敵嘅西班牙國腳，贏過西甲、歐聯同洲際盃；而舊年去咗美國大聯盟踢紐約紅牛，以咁勁嘅資歷，就算家陣34歲，如果肯留效傑志肯定係球迷之福。不過傑志總領隊伍健同教練甘巴爾好坦白，話冇乜可能留到施拉迪斯，但希望球員喺佢身上學到嘢就得咁話。另外，何老鑑已經好多年冇喺電台講波，但佢老人家仍不時入場睇波，今次傑志同新城邀請到佢客串，對老一輩球迷嚟講都算有賣點。