噚日星展集團就好似提早過年咁，一片紅噹噹喜氣洋洋，事關舊年底履新嘅集團CEO古普塔嚟咗香江，同千幾個員工見面交流。古總裁同星展香港一姐Amy葉約德都好應景，着晒過年嘅紅色棉襖，配埋紅色領巾現身。
搞「撈魚生」儀式
獅城同香港係亞洲雙城，過新春嘅文化都好接近，最緊要就係意頭好，好似做生意就搞吓「撈魚生」儀式，取其「撈起」即風生水起之意。古總裁話會大破慳囊，向員工派利是，亦會向客戶餽贈吉（桔）袋；所謂吉袋，其實係內藏兩個大柑同埋朱古力嘅福袋，取其「帶金（柑）」意思，乃承傳祖籍福建嘅新加坡華人傳統。
古總裁同Amy噚日下晝見完記者後，又馬不停蹄踩落維園，主持星展贊助嘅學生營商計劃年宵攤位，一盡企業社會責任。