上周末西營盤新盤縉城峰銷情熱烘烘，兩日賣出150伙，最受歡迎竟然係一房唔夠500呎嘅單位，原本約500萬元可以入場，由於單位少只得72伙，喺炒供求情況下，發展商加價兩成到每呎13292元仍不乏捧場客。唔少炒友喺首批認購時只分到過千呎嘅大單位，由於價碼太大，認為冇乜水位炒上，可見專業炒家都爭相落飛想買細單位，貪佢幾百萬「細細粒」易轉身。
喺發展商刻意留水位畀首批買家摩出，既可以造勢亦帶動埋區內二手，令炒家、發展商同代理三贏。接貨嘅投資者可能要有多啲耐性，一旦短期摩唔出，要預留實力上會，始終位置喺正將來地鐵站側邊，有一定防守性。
如果閣下認為香港樓價升得太誇，請不要於過年期間到海南島旅遊，怕你會嚇到心臟病發。《廣州日報》話，過年期間由於缺房，亞龍灣嘅超豪酒店房都有得炒，泳池別墅套房一晚承惠近16000元人民幣，文華東方最平房價更要18400元。聽落好誇，但即使打個五折，房價亦貴得驚人。
炒樓團順便度假
據聞有3大原因令酒店房有價︰一係多炒樓團進駐，睇樓之餘要嘆世界，搞到間間酒店訂滿；二係有人囤積居奇；三係多北方公費旅遊嘅「商務客」，由於被嚴禁外出旅遊，焗住喺內地消費，海南島夠晒貴，啱佢哋口胃，反正唔係自己錢。
海南島已貴為內地特權省分之一，風頭一時無兩，政府打算喺三亞市區28公里以外，再大興土木，打造中國最豪度假區，將有兩間七星級酒店、11個高球場同4個主題公園。
唔誇張，呢個海棠灣項目其實由05年講到家，至今仲係水清沙幼嘅原始風貌。直至去年5月，包括君悅、喜來登、香格里拉、萬麗等10間酒店同日動工，場面非常壯觀，但距離盈利期起碼幾年時間，海南概念係要買，但唔使急。焦點股除咗雅居樂（3383）有地，保利香港（119）、中糧集團等分別喺海棠灣有8.84及4.13平方公里發展面積，嘉里建設（683）07年以6.23億元人民幣投得酒店地皮，幾年後香格里拉起好至有盈利貢獻。
胡孟青