由幕前走到幕後發展嘅趙頌茹現已改名趙梓淇（Yu），佢同周永恒（Roy）上月尾結束6年愛情長跑拉埋天窗，估唔到隔咗冇耐又傳嚟喜訊，兩人已經有咗愛情結晶品，過多8個月左右，Yu同Roy就做爹哋媽咪嘞！聽到呢個消息後，馮仁昭噚日打電話畀準爹哋媽咪，原來阿Yu唔係好舒服睇緊醫生，Roy聽到馮仁昭恭喜之後不知幾咁開心，語氣成個大細路。
身體弱陀B見暈
問到阿Yu有咗幾多個月？Roy話：「結婚前我哋停咗（性生活）兩個月左右，我諗都係咁上下時間，今日先第一次睇醫生，之前用檢孕棒，結果係positive（陽性），知道咗不知幾開心。我哋父母已經知晒，嫲嫲同婆婆就最開心，因為四代同堂嘛！」
阿Yu身體有乜唔舒服？Roy話阿Yu除咗有嘔之外，仲好易覺得焗同埋頭暈，所以買咗把風扇仔畀佢通吓風。至於第一胎想生仔定女？Roy話冇所謂，最緊要健康。
想老婆全職湊仔
但阿Yu家做形象顧問要成日四圍去，Roy好坦白話想佢轉做freelance，生完BB最好做全職主婦，由佢負責搵錢養家喎！臨收線阿Yu都講咗幾句，佢話心情好矛盾同埋個人好虛弱，可能之前搞結婚太忙搞到身體弱咗。
