去年奉子成婚的咪神徐淑敏（Suki），下月23日將剖腹產女，雖然臨盆在即，但Suki仍十分活躍，上周出席完化妝品牌活動後，即偕老公黃浩到上環老字號安記買海味過新年。由於舖頭人頭湧湧，黃浩遂全程貼身護妻免被碰撞。
咪神徐淑敏已擇好下月23日吉日剖腹產女，雖然一向貪靚的她，因為臨盆在即關係已改穿平底鞋，但其好動性格卻絲毫沒有改變。上周四，懷孕8個月的Suki到旺角出席完一化妝品牌活動後，即偕老公黃浩（Kenny）四出辦年貨，為迎接虎年作好準備。上周四傍晚6時許，腹大便便的Suki與Kenny乘七人車抵達上環急庇利街的老字號安記海味，二人一進舖頭即揀選鮑參翅肚，由於臨近過年不少人選購海味，以致舖內人頭湧湧，相當擠逼，Kenny為免老婆受碰撞，遂全程貼身護妻。
Kenny親自下廚
當Suki想揀貨架上高高擺放的海味時，Kenny即第一時間為老婆大人「擒高擒低」攞貨，十足十阿四一般。大概半小時後，舖頭經理走出舖頭跟Suki和Kenny打招呼，見三人有講有笑傾了差不多10分鐘，看似頗為相熟。
打完一輪牙骱後，掃了大袋海味的Kenny便埋單找數，然後笑住與Suki登上七人車離開。Kenny昨接受電話訪問時表示，當日購買了花膠魚翅等海味，他說：「準備新年期間下廚整畀Suki同屋企人食，呢個係我強項。」
採訪、攝影：黃曉程、羅德光