美林前話事人塞恩自從俾美銀前舵手劉易斯攆走後，銷聲匿迹咗成年，最近終於重出江湖，接掌舊年底啱啱解除咗破產保護嘅商業貸款機構CITGroup，好多人話塞恩係為咗洗底，先肯降價接job。
年薪少咗三分一
塞恩舊年好運滯，喺美銀做咗唔夠3個禮拜，就俾人揭發佢喺美林被收購前大派花紅，之後又豪裝自己個office，結果俾劉易斯鏟走，仲搞到名譽掃地，俾《財富》雜誌選為09年最犯眾憎嘅CEO之一，所以唔少分析員話，塞恩肯接手CIT呢個燙手山芋，最大原因係洗底，因為救得返CIT，唔單止可以除去污名，分分鐘變埋「爛船救星」。
當年塞恩以75萬美金年薪空降美林，仲有1500萬美金嘅現金花紅，但今時唔同往日，佢喺CIT只得50萬美金薪酬，少咗三分之一，每年攞幾多花紅都受到限制，對大使慣嘅塞恩嚟講，呢份工真係唔易做。
CIT本來做中小企貸款，因為沾手次按，搞到間公司瀕臨破產，家雖然重生，但經營仲好困難，塞恩話佢首先會搞番好中小企貸款呢盤核心業務，大家就拭目以待，睇吓佢搞成點。
李華華
mailto:[email protected]