楊千嬅上周36歲生日，老公丁子高昨日出席活動時，透露當日送了365支紫色睡蓮給千嬅，代表一年365日，一日一花，千嬅感動到眼濕濕。黃婉佩（Race）則自爆DIY牛奶朱古力浴男友向佐，更想做朱古力床。
丁子高和黃婉佩昨日在海港城出席「朱古力美術館」活動，在朱古力裸男雕塑和朱古力關公像前拍照，兩人又即場製作朱古力花，不過Race雞手鴨腳，多次失手。
預10萬派利是
丁子高謂想製作朱古力奶嘴給老婆楊千嬅，他說：「等佢好瞓啲，甜啲，加埋我瞓喺隔籬更加好啦。」千嬅上周三36歲生日，丁子高和兩家父母飛到上海陪千嬅慶祝，他謂送了首飾和花給老婆，他說：「佢之前話我冇送花，我送過一盆，佢又話似一盆桔，今次就送咗365支睡蓮，因為平時冇送，佢又鍾意紫色，佢收到都有啲眼濕濕。」
兩人婚後首個情人節和新年，丁子高謂第一年派利是都會派雙封，他預備了5位數字派利是，但兩公婆估計要派過10萬。早早生仔可以幫補利是，丁子高說：「都會，但佢好忙，今年又話要出兩隻CD，我唔怕佢高齡，最緊要身體好，要睇住佢，因為佢好鍾意食嘢，又成日亂食。」
Race食朱古力鞭
此外，向太曾謂要送鞭給Race管向佐，在台上時，司儀提議Race整朱古力鞭，更謂打完可以食，搞到Race忍不住失笑，鬼馬笑說：「食鞭？」
Race指想整朱古力床，又自爆曾經炮製朱古力浴給男友向佐浸，但沒鴛鴦浴，她說：「佢自己冲，我用牛奶整，佢可以邊食邊冲。」
之後Race透露原來向佐愛吃朱古力比吃飯更甚，搞到家中多螞蟻，要限制晚上9時後不准吃。她又謂團年飯會和向太一家吃，之後男友陪她返新加坡。
採訪、攝影：JessicaNgan