迎接春節假期，已經進入倒數階段，梗係開心，亦係時候喺屋企擺番啲年花，增加節日氣氛啦。有車嘅你，又使乜等到年三十晚同人喺花市逼到實咁買年花，即時就可以直踩新界花場落手落腳自己揀啦！不過搵啱路，揀啱花，要保持靚靚咁搬佢返屋企都有啲技巧，亂咁嚟，搞到靚花變殘花就唔多好啦。
記者：趙慧敏
攝影：楊錦文
Model：Kinki@PureModels
鳴謝：潤利源花場（93770243）
Keep住靚樣返屋企
直接去花場揀桃花，選擇夠多唔在講，揀啱嘅桃花，仲會有專人即時替你鋸落嚟，啱晒香港人乜都要新鮮嘅要求。不過，如果唔係棵桃花大到客貨車都放唔入，一般花場都唔會替客人運送，要自己動手！若買巨型桃花，運費則係幾百蚊左右，視乎地點同花嘅大細而定。呢日揸住架現代嘅i30掀背車，要搬人咁高嘅桃花返屋企，就當然無可能塞入行李廂，真係有啲頭痕。不過喺花場老闆教路下，先知原來車頂都可以幫到手，雖然工夫就多啲，但就擔保你嘅桃花可以Keep住靚樣返屋企兼唔會刮花架車。就一齊睇睇師傅出招啦，20分鐘搞掂！
綁桃花大法
運菊唔用尾廂
其實車仔都可以運菊花同桔仔呢類大盆嘅年花。行李廂就梗係唔夠高啦，唔好將佢瞓低呀！放喺後座位置，搞掂！
搵靚花兩大熱點
林錦公路 價錢相宜
大埔林錦公路係桃花場集中地，可以大埔林村為起點，由較寮下開始，已經有多個花場，車主可沿林錦公路向元朗方向行駛，再轉入錦上路，至錦田，都是花場集中地，唔少花場都會喺路口掛上招牌。這一帶嘅年花除部分貨源是內地外，其餘都是本港花農種植，價錢一般較相宜。
貼士：沿路片片桃花陣，簡直有如日本櫻花節，不過咪掛住睇靚景而忽略路面情況。林錦公園彎位頗多，而且不少車輛會由兩旁村路出大路，小心！
西貢公路 花圃分散
住喺香港又或者九龍東嘅人，如果嫌大埔太遠，西貢都係唔錯嘅選擇。由清水灣道向西貢出發，至井欄樹村開始，再轉入西貢公路，沿路都有不少花圃，但位置較為分散，較集中嘅只有西貢公路大涌口路一帶。
貼士：這一帶經營嘅大多係花圃，而非花場，桃花一般已鋸下，但會放入盆內繼續栽種，新鮮程度不遜於花場。
i30細車一樣搬得掂
今次由現代i30陪我遊足兩條買花路線，發覺佢車仔細細，喺鄉郊路段穿梭靈活到不得了，上落大斜路都難佢唔倒，始終係2公升偈。不過車上坐足幾個大男人，內櫳空間就始終要扣點分，車身寬度就夠晒，不過後座腳部伸展位稍嫌不足，加埋車身低，坐喺後面個高佬，多少有啲壓迫感。
引擎：1,975cc直四
馬力：143hp/6,000rpm
扭力：19.0kgm/4,500rpm
傳動：四前速自動波，前驅
售價：$165,200起
查詢：現代汽車（34288288）
