呢日上的士，嗌聲：「唔該去灣仔熙信樓，駱克道落。」司機竟然講：「去警察總部呀？記者雲集噃，係唔係去睇陳振聰？」左丁山連忙澄清：「去喜萬年食飯呀！」到咗駱克道，只見對面警察總部門前企滿攝影記者，苦候主角出入，採訪呢啲新聞，辛苦處不足為外人道。
上到喜萬年，成班老友個個講陳振聰，睇無綫下午一時新聞，講完陳振聰事件，主人家就叫夥計熄電視，股市升跌，竟無人理會。陳振聰平時在中環出入，關係不少，我哋飯局中人，總有人識得佢或佢之朋友，講起嚟不勝欷歔，有人講：「世道無常，假作真時真作假，真真假假，假假真真，真假難分，一早斬斷條根，剩袋幾十億，就唔會惹塵埃啦。」事後或者識講嘅，事先何人有此智慧呀。
華懋慈善基金勝訴，睇吓如何應付新挑戰嘞。本來私人慈善基金，冇乜人會關心、關注嘅，但因為呢次官司，驚動律政司司長為慈善基金保護人，全世界都知，假若官司了結，會有幾百億元資產等緊基金接收，收到之後，基金如何運作呢，此包括基金投資管理、基金行政組織、基金之慈善撥款策略、批核捐款之機制，及日常管理等等，如要全部做得好，非專業人士當家不可。從審案時睇到嘅資料，龔如心啲細佬妹嘅工作背景似乎唔多夾噃，相信佢哋要不惜腰間錢，禮聘呢方面嘅人才至得。賽馬會慈善基金每年捐款十億元，多年來請埋唔少專家，其專業性亦在世界上享有聲譽，他日華懋慈善基金之資產規模好可能大過馬會，只係靠姓龔嘅去管理，或者原華懋地產嘅職員管理，未必可行o架。此基金已成萬人注目嘅對象，行政總裁想話保持低調呀，難咯。講天地有正氣就容易，做起事上嚟，如何維持「在晉董狐筆，在漢蘇武節……或為遼東帽，清操厲冰雪……」就需要氣魄氣量與能力，全港市民到實呀！