前晚跑馬地好熱鬧，周啟生同王敏德分別拖住囝囝囡囡去便利店買嘢，不過王敏德個老婆馬詩慧就未見出現，反而周啟生身邊就多咗個新女友同行。
女伴一同回家
前晚7點左右，周啟生拖住10歲大嘅囝囝入咗去跑馬地間便利店，見佢囝囝孭住個大書包，估計周啟生啱啱湊仔放學或者等囝囝補完習，除咗周啟生兩父子之外，同行仲有着住便服紮住馬尾嘅女友。周啟生喺便利店買完啤酒就搭住囝囝膊頭同埋女友一齊離開，然後返咗去成和道一幢大廈。噚日周啟生就承認話同行嘅係女友，其他嘢就唔多講嘞！
過咗10分鐘後，王敏德亦同佢個二女王麗嘉去便利店買零食，14歲嘅麗嘉見到零食就兩眼發光，未行到出門口已經急不及待狂擦，王敏德見個女食得咁開心，自己都忍唔住笑咗出嚟。
遺傳父母身高
之後王敏德蹺住囡囡隻手行上跑馬地，雖然麗嘉只得14歲，但佢拍埋老竇身邊身高一啲都唔輸蝕。
王敏德有6呎高，太太馬詩慧都唔弱有成5呎9吋，就咁睇麗嘉都起碼有5呎8、9吋，細路女仲有得發育，等過多幾年，分分鐘高過老竇都唔定。
