俗語有云：人衰行路打倒遯；雖然我求大俠唔鍾意落井下石，寧願雪中送炭，不過，睇到前日曼城後衞布歷治喺作客侯城場英超聯嘅遭遇，呢句說話又真係幾貼切噃！
侯城躉嘲笑布歷治
29歲嘅布歷治經歷「男人最痛」，遭英格蘭兼前車路士隊友泰利送嘅綠帽大大頂由頭笠落腳，似足《水滸傳》入面嘅武大郎。喺前日曼城作客「老虎」侯城場英超聯，司職左後衞嘅布歷治就自去年11月初受傷以嚟，首次正選披甲，佢全場俾侯城球迷笑佢戴綠帽之下，有幾腳波表現得好似若有所思，反應慢啲，就在所難免；不過，整體嚟講，佢都算表現得唔錯，仲不時有助攻㖭。
點知好衰唔衰，侯城突然間表現不知幾咁神勇，特別係之前冇乜表現嘅美國前鋒艾迪杜里，呢場突然之間嚟料，左穿右插，令布歷治疲於奔命，最後艾迪杜里仲射入自己喺今屆聯賽第1球，替侯城領先。咁仲未算，布歷治之後仲勇戰至爆缸，但係就始終都挽救唔到球隊爆冷以1:2落敗嘅命運，可憐曼城個「武大郎」唔掂，「武松」艾迪巴約入1球又唔夠打「虎」，家只係以23戰得41分排第6。
喺賽後，曼城領隊文仙尼就好唔滿意侯城球迷，全場波都用啲針對布歷治私生活嘅說話嚟嘲笑佢，指佢哋超冇品。不過，文仙尼就認為布歷治嘅表現唔錯，仲話相信佢之後會越踢越好。雖然我求大俠唔知文仙尼咁講係真心定係門面說話，不過曼城有品又係不爭嘅事實。
曼城拒賺「陰騭錢」
曼城球員好似泰維斯及艾利蘭等，為咗支持布歷治，喺之前對樸茨茅夫嘅聯賽，已喺波衫底下着住件印有「TeamBridge」嘅T恤，而呢件T恤曝光後，即刻成為大熱，好多球迷都向曼城詢問有冇得賣。不過，曼城就表明唔會搵球員嘅痛苦嚟賺錢，所以拒絕出售呢款T恤，發財都要立品，曼城又真係幾抵讚。