海地大地震災情嚴重，廉署都想出一分力，早排舉辦咗個「創意籌款」。講到明要有「創意」，廉政專員湯顯明捐咗個「頭部按摩器」出嚟作慈善拍賣，話因為廉署人員成日同貪污分子鬥智鬥力，啱晒佢哋用喎。
今次籌款，募捐、拍賣、獻唱、義賣食物乜橋都出齊，結果廉記合共籌到18萬，稍後會轉交國際援助組織賑災。廉署中人話，籌款高潮係上星期三嘅籌款晚會，成200人參加，湯顯明同幾個處長都捐嘢出嚟拍賣，執行處首長李銘澤、兩個處長李俊生同黃世照三個高層就贊助現場食物。
有個廚藝了得嘅防貪處人員亦好有創意咁，推出「慈善燭光晚宴」，自己設計菜式仲親自下廚，成功吸引到同事出價。