雖然中央政府對新疆武警打香港記者事件不了了之，但身為香港記者協會主席嘅麥燕庭Mark姐就一直跟進，仲喺最新主席報告中透露，有個別人大曾經建議為免同類「誤會」發生，不如向到內地採訪嘅香港記者發放印有「記者」字樣嘅臂章或者罩衣，等記者得到保護，據聞建議仲得到個別中方官員認同。
行走江湖多年嘅Mark姐一聽到即時大叫「唔好」，事關咁做等於暴露記者身份，咪即係等啲官員更易阻撓記者採訪，結果適得其反，其實方便香港記者嘅最佳方法就係取消到內地採訪要預先申請嘅規定。至於記者喺四川被屈藏毒，Mark姐引述事後有人竟然懷疑記者聽錯公安嘅指控，辯稱有地方口音嘅四川公安其實係講「藏獨」而唔係「藏毒」，相信聽到呢個解釋嘅人除咗O嘴，都唔識點回應。