即將開筆寫財政預算案嘅鬍鬚曾，最近被人問得最多嘅問題就係「有冇糖派？」佢噚日喺網誌以《我不派糖》為題，話如果有人唔識佢，唔知會唔會以為佢喺糖果廠做，隨時隨地都有糖送畀大家？雖然外界好想佢派糖，但鬍鬚曾話根本唔鍾意「派糖」呢個講法，因為「派糖」好似大人向小朋友示好嘅姿態咁，身為公僕又點可以有向市民施予恩惠嘅心態呢？
佢堅持「派糖」無助公共事務討論，大家只會諗會唔會得益，唔會探討措施背後嘅合理性同公義性。其實鬍鬚曾講嚟講去都係想講，今年唔會有太多糖派，但鬍鬚曾不忘發揮爛gag作風，強調仍會派糖，不過係新年期間全盒入面嘅糖同朱古力囉。