歐洲五國信貸危機引發環球小股災，港股上周五大跌，期指又低水過百點，按呢款牌路判斷，大市短期尋底壓力仍在。不過，美股上周五雖然一開都係跌，但臨尾卻倒升收場，表面睇又唔係太差，今日好友唔一定輸晒。
其實，臨近農曆新年假期，不少散戶見大市氣氛咁淡，已無心戀戰，即使要炒，入市對象都揀短線跌幅較大股份博反彈，以及上市時日較短之半新股，貪其與指數升跌關係冇咁大，好似上周五掛牌的中駿置業（1966），收報2.72元，比招股價2.60元高出4.6%，所謂炒股要跟紅頂白，幕後只要肯撐，逆市照升都仲得，散戶揀貨追，都係搵呢類。
中國太保（2601）上月底跌落28.50元後即見拗腰回升，三扒兩撥即升越32元，近日雖見調整，但幾家大行不約而同發表報告睇好，建議增持。
太保上周五收報30.95元，下跌1.1%，股價短線在10日線約30元水平應守得住，可趁機吸納，獲利目標先睇38元。
方星俠