社交網站facebook嘅群組「我相信可以召集100,000個厭惡民建聯的人！」上周突然人間蒸發，激發網民怒潮，鋪天蓋地洗版喪插fb政治審查。呢個群組受難三日之後，噚日中午離奇復活，截至夜晚已經多咗1,000人加入，累積超過8.5萬人。群組發起人揚言，達到10萬人呢個目標指日可待，到時會發動第二波攻勢，同民建聯玩鋪勁。
群組發起人KelvinSit對fb彈弓手感到奇怪，群組上周四消失，過百網民發揮群眾力量，紛紛寫信向fb、BBC、CNN同《紐約時報》投訴。佢懷疑fb可能抵受唔住壓力，所以低調開番個群組，但由始至終冇交代原因。有成員話群組復活後運作唔多穩定，例如有啲留言無故消失，或者邀請唔到朋友加入。
「我相信可以召集100,000個厭惡民建聯的人！」係反民建聯群組龍頭，消失之後其他同類群組遍地開花，「重生版」開波唔夠五日已經累積近70,000人加入。有網民話，今次事件好比五區公投，預言辭職議員必定好似呢個組咁強勢回歸。另有網民好陰謀論咁話，呢招係要打散網民，催生咁多個組，反而更難凝聚反民建聯勢力。
政治群組人間蒸發並唔係個別事件，Kelvin嘅「民建聯禮義廉」同「民建聯最無恥」，其他網民發起嘅「這是一個警告：我們對狗官沒有耐性，已準備流血革命。」等等，上周都離奇消失，仲等緊fb發落。
達10萬人即設監察組
Kelvin聽聞中聯辦已經發動新一輪攻擊，組織大專內地生喺網上製造民意，預計呢班有組織、有預謀嘅五毛黨會繼續向fb舉報反民建聯群組，隨時唔知邊組又會冚旗。因此佢家奉行多組政策，呼籲網民新舊組都要加入。當其中一組儲夠10萬人，Kelvin就會同網民開一個民間組織，監察民建聯一舉一動。佢哋初步諗住籌錢登報，揭穿民建聯真面目，例如違背爭取07、08雙普選嘅選舉承諾，撐高鐵卻唔撐政府優先聘用本地工人，「成功爭取」只係馬後炮等等，又會組織網民去民建聯活動踩場抗議。
mailto:[email protected]