新世界中國（917）跌到落半年低位，齋計重估前折讓，已經好吸引，係時候。新中計埋上年11月供股攤薄效應，最新NAV6.15元，現價2.38元，係近半年低位，相對NAV折讓61%，呢期內房股調整，但好多家龍頭企業，冇折讓之餘，PB仲高企兩三倍水位，講折讓吸引力，新中直情彈出嚟。
又新中手頭投資物業、酒店及發展中物業土儲面積高達2.98億平方呎，晒士絕對唔嘢少。真係係咁意計數，以每方呎增值10蚊，已經可以為新中帶嚟近30億銀嘅額外增值。新中重估後NAV上到8.70元，折讓擴大到72%，流晒口水。新中近半年整咗個下降楔形，楔形底2.30元，吼實楔形底入市，中線博新中翻半番到3.45元，集團重估後NAV折讓仲高達60%，實情仲有大把收窄空間。
世城財政佳折讓大
世紀城市（355）現價0.53元，同03年8月沙士復蘇期差無幾。齋計集團酒店資產重估，NAV1.66元，現價折讓已經高達68%，連豪宅「富豪海灣」價值反映，折讓更唔止呢個水位。又世城手頭現金3.4億銀，得銀貸2.1億銀，淨現金1.3億銀，財政好穩陣。呢轉同樣炒NAV折讓，吼實世城1年支持0.49元兜轉，短打博升20%到0.59元，世城目標價NAV折讓，仲係高達64%。
錢雋